Քիչ առաջ Հայկ Կյուրեղյանի գործով դատավարությունը Կենտրոն եւ Նորք-Մարաշ վարչական շրջանների ընդհանուր իրավասության դատարանում որոշ ժամանակով դադարեցվեց:
Քաղաքացիական ակտիվիստ Վարդգես Գասպարին հենց դատական նիստի սկզբում պառկեց դահլիճում: Մինչ պառկելը՝ նա որպես ոչ հարգանքի նշան, դատավորի նիստերի դահլիճ մտնելիս չկանգնեց եւ ասաց՝ «դուք ի՞նչ դատարան եք, իշխանությունների կամակատարն եք»: Դատավորի հրահանգով կարգադրիչները Վարդգես Գասպարիին դուրս բերեցին դահլիճից պառկած վիճակում: Պարոն Գասպարին որպես բողոքի նշան պառկեց նաեւ դատարանի միջանցքում:
Դատական նիստը այդ ընթացքում ընդմիջվել էր եւ նիստի այլ մասնակիցներ սկսեցին կարճատեւ բողոքի ակցիա անցկացնել հենց դատարանի միջանցքում:
Նրանք հիշեցին նախօրեին Գյումրիում տեղի ունեցած սպանությունը ու Գասպարիին դուրս բերած կարգադրիչներին դիմելով ասացին, որ վաղն էլ իրենց թոռներին ու երեխաներին են գնդակահարելու, քանի դեռ մեր իշխանությունները Ռուսաստանի կամակատարներն են: Նրանք դժգոհում էին, որ Հայաստանը անվտանգ երկիր չէ:
Կարդացեք նաև
Այս պահին դատական նիստը վերսկսվում է, իսկ ցուցարարները հեռացվել են նիստերի դահլիճից:
Արփինե ՍԻՄՈՆՅԱՆ
