Իրենց իսկ տանը սպանդի ենթարկված Ավետիսյանների դիակը Գյումրու Սուրբ Նշան եկեղեցի տեղափոխելուց հետո գյումրեցիների հոսքը չի դադարում: Գյումրու դրամատիկական թատրոնի մենեջեր Տիգրան Վիրաբյանը, որը դեռ եկեղեցում է, մեզ հետ զրույցում ասաց, որ հավաքվածների 90 տոկոսը հանգուցյալներին անծանոթ մարդիկ են, եկել են իրենց ցավակցությունն ու վրդովմունքը արտահայտելու:
«Հանգուցյալներին մի ժամ առաջ եկեղեցի տեղափոխեցին, բայց այլևս կանգնելու տեղ չկա. որևէ հայտարարություն չի հնչել, որ Ավետիսյանների դիակները տեղափոխում են եկեղեցի, բայց մարդիկ, մեկը մյուսից լսելով, շտապում են այստեղ: Անպատմելի ու աննկարագրելի է, թե այս պահին ինչ է կատարվում Սուրբ Նշան եկեղեցում: Հավաքվածները չեն կարողանում զսպել իրենց. կան մարդիկ, որոնք բարձրաձայն արտասվում են, գոռգոռում են, կոկորդները լցված են, կան մարդիկ, որոնք ուզում են, անպայման, իրենց գնահատականը հնչեցնել, վերլուծել: Նրանց զսպում է մեր հոգևոր առաջնորդի՝ Միքայել Սրբազանի ներկայությունը:
Սրբազանն իր խոսքում ասաց, որ մենք մարդու հետ գործ չունենք, այլ սատանայի, երբ Սրբազանը սկսեց աղոթքը, եկեղեցում հավաքվածները մի մարդու պես սկսեցին աղոթել ու իրոք հանգստություն տիրեց: Հիմա ամենակարևորն այն է, որ բոլորս միասին աղոթենք, Աստծուն խնդրենք, որ առողջություն տա այս սերունդը շարունակող փոքրիկին: Ես՝ որպես հասարակ քաղաքացի, որը չի ճանաչում այդ ընտանիքին, կասեմ, որ սա ողբերգություն է մեր քաղաքի, մեր երկրի համար, չեմ գտնում բառեր գնահատական հնչեցնելու կատարվածի մասին»,- ասաց Տիգրան Վիրաբյանը:
Կարդացեք նաև
Նունե ԱՐԵՎՇԱՏՅԱՆ
