Armenia Today կայքի համակարգող Արգիշտի Կիվիրյանը համոզված է, որ դատարանում իր պաշտպանների ներկայացրած միջնորդությունը դատարանը չէր կարող չբավարարել:
«Սա այն միջնորդությունն էր, որն անհնար էր չբավարարել, որովհետեւ պետք է անցկացվի փորձաքննություն` ստուգելու այն տվյալները, որոնք իբր թե նախաքննական մարմինը ստուգել է: Խոսել, թե այս միջնորդության բավարարումը կարող է լուրջ ազդեցություն ունենալ գործի վրա, անիմաստ է, առավել եւս, որ բազմաթիվ դատական նիստերով տեսնում ենք դատարանի դիրքորոշումը` ամեն կերպ փորձել հիմնավորել նախաքննական մարմնի հեքիաթը: Իսկ նախաքննական մարմինը փորձում է ապացուցել` իբր թե այն դիրքով, երբ ես եղել եմ բերման ենթարկվելիս մեքենայի մեջ, կարող էի զբաղվել ինքնավնասմամբ, ինչը ակնհայտ սուտ է: Այդ միջնորդությունը հենց նրա համար ենք ներկայացրել, որ ցույց տանք` դա անհնար է: Թող իմ կառուցվածքի մեկ այլ անձնավորության բերեն ու նստեցնեն ցույց տան` ինչպես է հնարավոր ինքնավնասումը»,- դատական նիստից հետո ասաց Արգիշտի Կիվիրյանը:
Դատարանն այս գործով որպես վկա ցուցմունք տալու ծանուցում էր ուղարկել նաեւ Կիվիրյանին ինքնավնասման մեջ տեսած ոստիկանին, բայց մինչեւ այսօր այդ վկայի դատաքննությունը տեղի չի ունեցել, վկան չի ներկայանում:
Թե ի՞նչ անդրադարձ կունենա գործի քննության վրա վկայի չներկայանալը մեր հարցին՝ Արգիշտի Կիվիրյանը պատասխանեց. «Վկան ոստիկանության ներկայացուցիչներից մեկն է, ակնհայտ է, որ պրակտիկայում ոստիկանությունը հենց օգտագործում է այդ կեղծ վկաներին, հետո դուրս է շպրտում: Տեսնում ենք հենց այդ իրավիճակը: Տարբեր գործերով ոստիկանությունը հենց իր աշխատակցին օգտագործում է, հետո օգտագործված գործիքի պես շպրտում է փողոց»:
Կարդացեք նաև
Դատարանն այսօր հայտնեց, որ ոչ պաշտոնական տեղեկություններով՝ նշված վկան դուրս է եկել համակարգից, Հայաստանից էլ հեռացել է:
Հիշեցնենք, որ քրեական գործ է հարուցվել 2013-ին Կոմիտաս 5 հասցեում տեղի ունեցած դեպքերի առիթով, գործ է հարուցվել Քրեական օրենսգրքի 316-րդ հոդվածի 1-ին մասով (իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը):
Արփինե ՍԻՄՈՆՅԱՆ
