Ինչպես տեղեկացրել ենք, Գյումրու Մյասնիկյան 188 հասցեի տանն ապրող Ավետիսյանների 7 հոգանոց ընտանիքից փրկվել է ընդամենը 6-7 ամսական Սերյոժան, որին անգիտակից, ծայրահեղ ծանր՝ կրծքավանդակի ձախ կեսի բազմաթիվ կտրած-ծակած վերքերով, շոկային վիճակում, դեպքից 5-6 ժամ անց տեղափոխել էին Գյումրու «Մոր ու մանկան» ավստրիական հիվանդանոց:
Ինչպես Aravot.am-ին տեղեկացրեց հիվանդանոցի տնօրեն Աշոտ Կուրղինյանը, դեռևս երեկ ՀՀ առողջապահության նախարարի հետ խորհրդակցելուց հետո իրենք Գյումրի էին հրավիրել մասնագետների Երևանի «Սուրբ Աստվածամայր» բժշկական կենտրոնից: Գյումրի էին եկել այդ բժշկական կենտրոնի տնօրեն Նիկոլայ Դալլաքյանը, վիրաբուժական բաժանմունքի վարիչ Արայիկ Կարապետյանը և ռեանիմացիայի բաժանմունքի վարիչ Աննա Չոբանյանը: Նրանք ևս հաստատել են գյումրեցի բժիշկների տված ախտորոշումը, երեխայի վիճակը նույնպես գնահատել են ծանր կայուն՝ նշելով, որ Գյումրու ավստրիական հիվանդանոցում նա ստացել է ճշգրիտ և ամբողջ ծավալով բուժում, սակայն հետագա բարդություններից խուսափելու նպատակով առաջարկվել է բուժումը շարունակել Երևանում:
Ըստ Աշոտ Կուրղինյանի, երեխայի վիճակի մասին պարբերաբար զեկուցվել է առողջապահության նախարարին: Այսօր ևս խորհրդակցելով նախարարի հետ՝ երեխային տեղափոխել են մայրաքաղաք ռեամոբիլով, այսօր ավելի կայուն է եղել փոքրիկի վիճակը:
Նունե ԱՐԵՎՇԱՏՅԱՆ
