ՌԴ-ի՝ միգրացիոն օրենսդրությունում կատարած փոփոխությունների համաձայն, այդ երկիր մուտք գործելու արգելք է սահմանվել այն օտարերկրացիների համար, որոնք կխախտեն օրինական կեցության ժամկետը։ Այսուհետեւ, ովքեր Ռուսաստանում կմնան սահմանված ժամկետից 120 օր ավելի՝ կզրկվեն այդ երկիր մուտք գործելու իրավունքից 3 տարով, 270 օր անլեգալ մնալու դեպքում կզրկվեն 5 տարով, իսկ 360 օր եւ ավելի մնալու դեպքում՝ 10 տարով։
Թե ՌԴ-ի օրենսդրական այս փոփոխությունն ինչպես կանդրադառնա Հայաստանի քաղաքացիների վրա՝ Aravot.am-ի հետ զրույցում «Ժառանգություն» խմբակցության պատգամավոր Թեւան Պողոսյանն ասաց. «Իդենտիֆիկացիայի խնդիր ենք ունենալու: Միգուցե այն մարդիկ, որոնք նախկինում ունեցել են խնդիրներ, պրոբլեմներ՝ կախված ժամկետի հետ, հիմա այդ հարցերը չեն ունենա, ավելի հանգիստ կմնան ու կաշխատեն: Դրա հետ միասին, եթե նախկինում մարդիկ ՌԴ գնալիս մտածում էին, որ սա իրենց կյանքի վերջին կետն է, հազիվ եկել են, եւ սկսում էին գումարներ վճարել թաղայինին կամ այլ տեղեր, հիմա այդ հնարավորությունները միգուցե կվերանան: Այդտեղ հարմար չի՝ կմեկնի մեկ ուրիշ քաղաք, կվերադառնա Հայաստան ի վերջո»:
Ըստ Թեւան Պողոսյանի, այնուամենայնիվ, այդ ամենը միայն փաստաթղթի վրա է գրված. «Թե պրակտիկան ինչ ցույց կտա, միայն կյանքի ընթացքում կերեւա: Հաշվի առնելով, թե Ռուսաստանում ինչպիսին է դատական համակարգը, կոռուպցիայի իրավիճակը ռուսական, ղազախական կամ բելառուսական շուկայում, կարծում եմ, այսպես ասած այն ազատությունը, որը թղթի վրա գրված է, մենք իսկապես չենք ունենալու»:
Հռիփսիմե ՋԵԲԵՋՅԱՆ
