Այս շաբաթ ռուսական ռուբլու փոխարժեքը նորից անկում արձանագրեց: Փորձագետների կարծիքով, չնայած ֆինանսական համակարգը կայունացնելու՝ Կառավարության խոստումներին, երկիրը շուտով հայտնվելու է տնտեսական հապաղման փուլում։
Մի իրադրություն է, ասում է տնտեսագետ Ուրի Դադուշը, որը մինչև բարելավվելը դեռ պիտի շարունակի վատթարանալ։ Քարնեգիի հիմնադրամի վերլուծաբանի խոսքերով, տնտեսական հապաղումից հետո երկրին սպասվում է նաև տնտեսական ճգնաժամը։
Ներդրողները Ռուսաստանից արդեն դուրս են բերել 100 միլիարդ դոլար։ Ռուբլին կայունացնելու և բանկերին փրկելու նպատակով Մոսկվան կտրուկ բարձրացրել է տոկոսադրույքները և հայտարարել դեպի ռուսական բանկեր 20 միլիարդ դոլար մղելու ծրագրերի մասին։ Փոխվարչապետ Իգոր Շուվալովի խոսքերով, այս ամենը արդյունքում՝ «արդեն իսկ կայուն բանկային սեկտորն ավելի կկայունանա»։
Եթե նույնիսկ նավթի գները բարձրանան և հանկարծ Պուտինն էլ փոխի Ղիրիմի նկատմամբ քաղաքականությունը, միևնույնն է, Ռուսաստանից տարիներ են պահանջվելու տնտեսությունը վերականգնելու համար։ Վերլուծաբան Դադուշի խոսքերով՝ «հիմնականում տուժելու են ու երկար են տուժելու Ռուսաստանի միջին ու աղքատ խավի մարդիկ»։
Կարդացեք նաև
Իսկ Ռուսաստանի արտաքին գործերի նախարար Սերգեյ Լավրովն ասում է, թե իրենք ժամանակին շատ ավելի վատ պայմաններում են հայտնվել ու հաղթահարել դրանք։ Պատմությունը, ասում է նա, ցույց է տվել, որ ռուս ժողովուրդը կարող է հաղթահարել նաև այս դժվարությունը, «որից դուրս է գալու ավելի ուժեղ, քան նախկինում էր»։
Արամ ՎԱՆԵՑՅԱՆ
Հոդվածն ամբողջությամբ՝ սկզբնաղբյուր կայքում
