«Չեմ կարող ասել, որ «Ժառանգություն» կուսակցությունն ունի ձեռքբերումներ»,- այսօր՝ դեկտեմբերի 29-ին, «Պոստ սկրիպտում» մամլո ակումբում լրագրողների հետ հանդիպման ընթացքում, անդրադառնալով հարցին, թե 2014 թվականի ընթացքում որո՞նք են «Ժառանգություն» կուսակցության ձեռքբերումները, հայտարարեց «Ժառանգություն» խմբակցության անդամ Զարուհի Փոստանջյանը:
Նրա խոսքերով՝ եթե կուսակցությունը ձեռքբերումներ ունենար, ապա Հայաստանի Հանրապետության քաղաքացիները ավելի բարեկեցիկ կապրեին: Իսկ բացթողումներն ու անկումը, նրա կարծիքով, համատարած են. «Միգուցե մենք չունենք իշխանություն, որպեսզի իրական ազդեցություն ունենանք, բայց այնուամենայնիվ, ես կարծում եմ, որ խմբակցությունը հնարավորինս իր ռեսուրսների ներքո գործել է, բայց չի արձանագրել հաջողություն»:
Անդրադառնալով ԱԺ պատգամավոր Նիկոլ Փաշինյանի՝ իմպիչմենտի նախաձեռնությանը՝ Զարուհի Փոստանջյանը նշեց, որ պարոն Փաշինյանը Սերժ Սարգսյանին առնվազն երեք կետերով խնայել է, դրանք են՝ ԵՏՄ անդամակցությունը, 2013 թվականի ընտրությունները եւ մադրիդյան սկզբունքների վերաբերյալ հռչակագրի ստորագրումն է. «Խնդիրն այն է, որ այն պատգամավորները, որոնք հնարավորություն ունեին միանալու այս նախաձեռնությանը բազմիցս միացել են այլ նախաձեռնությունների՝ ապահովելով 44 ստորագրությունը՝ քաջ գիտակցելով, որ միեւնույնն է, ունենալով այդ 44 ստորագրությունները ընձեռնվում է արտահերթ նիստ հրավիրելու հնարավորությունը, բայց նիստը չես կարող ապահովել. Մեծամասնությունը բացակայում է»:
Հարցին, թե Զարուհի Փոստանջյանը 2015 թվականին ի՞նչ ակնկալիքներ ունի խորհրդարանական ոչ իշխանական եռյակից, նա հորդորեց սպասել մինչեւ 2015 թվականը, այդ ժամանակ, ըստ նրա, պարզ կլինեն քաղաքական ուժերի գործողությունները. «2015 թվականին մեզ սպասվում է խորը ճգնաժամ, որը լինելու է ոչ միայն տնտեսական, այլ նաեւ քաղաքական: Ե՛վ քաղաքական ուժերը, ե՛ւ հանրությունը պետք է պատրաստ լինեն այդ խորը ճգնաժամից հետո իրադարձություններին, որոնք անխուսափելի են: Մենք պետք է պատրաստ լինենք այդ ճգնաժամից հետո տեղի ունեցող իրադարձությունները դիմավորելու եւ ղեկավարելու»:
Կարդացեք նաև
Ամի ՉԻՉԱԿՅԱՆ
