«Ոտքի, դատարանն է գալիս»: Եվ Գորիսի նստավայրում շարունակվում է Թուրքիայի քաղաքացի Օսման Ուղուրլու և Վրաստանի քաղաքացի Ավթանդիլ Մատեաշվիլու գործով դատական հերթական նիստը:
Քանի որ նախորդ նիստին ամբաստանյալ Ավթանդիլ Մատեաշվիլին ինքնաբացարկ էր հայտարարել մեղադրող Արմեն Փանոսյանին, պատճառաբանելով, որ մեղադրողն անաչառ չի եղել, կանխակալ վերաբերմունք ունի գործի ելքի նկատմամբ, ուստի դեկտեմբերի 27-ի նիստին ներկա էր մի այլ մեղադրող` Հայկ Հակոբյանը:
Նիստի քարտուղարը ներկայացնում է 2 ամբաստանյալների ներկայացուցիչներին: Պարզվում է, որ նիստից բացակայում են Օսմանի և Ավթանդիլի թարգմանիչները, ինչպես նաև Օսմանի պաշտպան Վահե Մարգարյանը: «Բոլորն էլ պատշաճ կերպով ծանուցվել են: Նրանք իրենց բացակայության մասին որևէ փաստաթուղթ չեն ուղարկել: Ուստի, նրանց բացակայությունը համարվում է անհարգելի»,-ասում է դատավոր Դավիթ Գրիգորյանը: Փաստորեն, այդ 3 մարդկանց բացակայությունը խոչընդոտ հանդիսացավ նիստը շարունակելուն:
Դատական նիստի դահլիճում էր նաև Հայաստանում Վրաստանի արտակարգ և լիազոր դեսպան Շորենա Ցիկլաուրին: Նա հրաժարվեց իր այդտեղ գտնվելու նպատակի մասին հարցազրույց տալուց և ասաց, որ հարցազրույցը կլինի միայն դատավարությունն ավարտվելուց հետո:
Կարդացեք նաև
Դեկտեմբերի 27-ի նիստով էլ չավարտվեց 860 կգ հերոին տեսակի թմրանյութի գործով դատավարությունը: Այն կշարունակվի 2015 թ. հունվարի 20-ին:
Նշենք, որ այս տարվա հունվարի 17-ին Երևանում ձերբակալվել է Թուրքիայի քաղաքացի Օսման Ուղուրլին: Նա իր ձեռնարկության սեփականությունը հանդիսացող մեքենայի վարորդ էր ընտրել Վրաստանի քաղաքացի Ավթանդիլ Մատեաշվիլուն: Թուրքիայի քաղաքացիներ, եղբայրներ Մուստաֆա և Իսմայիլ եղբայրների թմրանյութը նրանք Հայաստանով, ապա Վրաստանով և Ուկրաինայով պետք է հասցնեին Եվրոպա: Սակայն Մեղրու անցակետում մեքենան զննման ենթարկելուց՝ մաքսավորները նկատեցին, որ մեքենայի թաքստոցում օտար մարմին կա: Երևանում կատարված փորձաքննությունից պարզվեց, որ այն տնայնագործական եղանակով պատրաստված հերոին տեսակի թմրանյութ է, որը բարեհաջող կերպով Եվրոպա հասցնելու համար Օսմանը կստանար 100 հազար դոլար` Մուստաֆա և Իսմայիլ եղբայրների կողմից:
Ալվարդ ՄԵՍՐՈՊՅԱՆ
Գորիս
