Գրականագետ ԱՐՔՄԵՆԻԿ ՆԻԿՈՂՈՍՅԱՆԸ անցնող՝ 2014 թվականը կարեւորում է առաջին հերթին գրահրատարակչական ոլորտում ունեցած արդյունավետ աշխատանքով։
-Վերջին տարիների համար աննախադեպ քանակով գրքեր են տպագրվել: Եվ կարեւորն այն է, որ դրանց մակարդակը, որակն է էապես բարձրացել, ու նաեւ պոլիգրաֆիական առումով են ավելի լավը: Հատկապես թարգմանական դաշտում եղան մի քանի իրադարձություններ:
Ցավոք, արդեն երջանկահիշատակ Սամվել Մկրտչյանը 2014 թվականին տպագրեց իր բոլոր նախկին թարգմանությունները, եւ դա մեծ նվեր էր հանրությանը, ընթերցողներին: Տարեվերջին Զավեն Բոյաջյանի թարգմանությամբ լույս տեսավ Ումբերտո Էկոյի երկար սպասված «Վարդի անունը» վեպը:
Տպագրվեցին աշխարհահռչակ հեղինակների նոր ստեղծագործություններ, կարելի է իրադարձություն համարել «Նոբելյան մրցանակակիրներ» մատենաշարի հիմնումը «Անտարես» հրատարակչության կողմից, որն արդեն երկու հեղինակի գործ է տպագրել:
Այս տարի լույս են տեսել նաեւ ժամանակակից հայ գրողների, մասնավորապես Արամ Պաչյանի նոր ժողովածուն, Արտավազդ Եղիազարյանի, Դիանա Համբարձումյանի, շատ երիտասարդ բանաստեղծների գրքեր:
Մի խոսքով` դաշտն այդ առումով շատ ակտիվ է, բայց 2015-ից սպասում եմ ոչ միայն գրահրատարակչական, այլեւ ընթերցողական ակտիվություն: Ի վերջո, այս ամենը ստեղծվում է նախեւառաջ ընթերցողների, դրանով իսկ` գրական դաշտում, երկրում ընդհանրապես մթնոլորտ փոխելու համար:
Ռուսլան ԹԱԹՈՅԱՆ
Կարդացեք նաև
Հրապարակումն ամբողջությամբ՝ «Հայոց աշխարհ» թերթի այսօրվա համարում:
