ՀՀ ԱՆ ԴԱՀԿ ծառայությունը Ամանորի և Սուրբ ծննդյան տոներին ընդառաջ դեկտեմբերի 26-ին երեխաների համար կազմակերպել էր տոնական միջոցառում: Արդեն գեղեցիկ ավանդույթի վերածված այս միջոցառմանը մասնակցում էին 1-12 տարեկան երեխաներ, որոնց ալիմենտի բռնագանձման և ծնողների հետ տեսակցությունների կազմակերպման հարցերով զբաղվում է Ծառայությունը։
Փոքրիկների համար կազմակերպվել էր հեքիաթների հերոսների մասնակցությամբ շոու-ծրագիր, այնուհետ նրանք նվերներ են ստացել ԴԱՀԿ ծառայության կողմից:
ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանը շնորհավորել է երեխաներին գալիք տոների առթիվ և նշել. «Մաղթում եմ ձեզ, որ բոլորդ լինեք առողջ, երջանիկ, միշտ ժպտաք, և որպեսզի ձեր մայրերն ու հայրերը ձեզ միայն ժպիտ պարգևեն»:
Լրագրողների հետ ճեպազրույցում Միհրան Պողոսյանն անդրադարձել է այն շուրջ 2500 երեխաներին, ովքեր Ծառայության հետ ունեն գործառույթներ: «Սա մեր Ծառայության ամենախոցելի և ամենամեծ ուշադրության կարիք ունեցող ոլորտն է: Մենք փորձում ենք ամեն ինչ անել, որ այդ երեխաները կարողանան իրենց զգալ ինչպես իրենց ընտանիքի ներսում»,- ընդգծել է ՀՀ գլխավոր հարկադիր կատարողը:
Կարդացեք նաև
Միջոցառման ավարտին Միհրան Պողոսյանը լուսանկարվել է փոքրիկների հետ:
Հիշեցնենք, որ Ծառայության՝ ալիմենտներին վերաբերող գործառույթներից են բռնագանձումները, տեսակցություններն ու երեխայի հանձնումը մի ծնողից մյուսին: 2014 թվականի վիճակագրության համաձայն՝ ընթացք է տրվել 1444 կատարողական վարույթի, որից 1305-ն` ալիմենտի բռնագանձման (դրանցից մարզային բաժիններում՝ 793 ալիմենտի բռնագանձման վարույթ), բռնագանձված գումարը՝ 487 մլն 762 հազ. 811 ՀՀ դրամ (որից մարզային բաժիններում՝ 291 մլն 709 հազ. 944 ՀՀ դրամ), 132-ը` երեխաների տեսակցության կազմակերպման (որից մարզային բաժիններում՝ 67 վարույթ) և 7-ը` երեխաների հանձնման վարույթներ են (որից մարզային բաժիններում՝ 4 վարույթ)։ Ընդհանուր առմամբ, Ծառայությունն աշխատանք է տանում 2486 երեխայի հետ:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԴԱՏԱԿԱՆ ԱԿՏԵՐԻ ՀԱՐԿԱԴԻՐ ԿԱՏԱՐՈՒՄՆ ԱՊԱՀՈՎՈՂ ԾԱՌԱՅՈՒԹՅՈՒՆ
