Այսօր «Փաստարկ» ակումբում հրավիրած ասուլիսում ՀՀԿ խմբակցության պատգամավոր Հայկ Բաբուխանյանը ամփոփեց 2014-ը եւ ներկայացրեց, թե ինչ օրենսդրական նախաձեռնություններով է հանդես եկել, եւ ինչպիսի առաջարկություններ է ներկայացրել խորհրդարանում:
Նա անդրադարձ կատարեց նաեւ ոչ իշխանական եռյակի ուժերին. «Ասել, որ իջեք այդ աթոռից, որ մենք նստենք, կարծում եմ, դա ճիշտ չէ: Հենց իրենք՝ ընդդիմադիրները, այն սրացումները, որ տեղի ունեցան աշնանը, անվանում էին որպես բուրժուադեմոկրատական հեղափոխության փորձ: Եթե օլիգարխիան, խոշոր բիզնեսը դեմ է այն ծրագրին, որով կառավարությունն առաջարկել է դուրս գալ ստվերից, դեմ է այն ծրագրին, որն ուղղված է սոցիալական խնդիրների լուծմանը, բյուջեի զարգացմանը, օրինականության ապահովմանը, ապա այստեղ մտահոգություն է առաջանում, թե ինչ է անում այդ խոշոր բիզնեսը, ինչ է ուզում օլիգարխիան երկրում»:
Հայկ Բաբուխանյանն ասաց, որ իրենք ունեն բացթողումներ, բայց չի կարելի իրենց ամբողջ ձեռքբերումները ստորադասել ինչ-որ մարդկանց անձնական շահերին. «Երբ մեր ընդդիմությունը կլինի ավելի գաղափարական, երբ կառաջարկվեն կոնկրետ ծրագրեր, կոնկրետ մտքեր, մենք պատրաստ ենք մեծ հաճույքով քննարկել դրանք, եթե դրանք ուղղված են երկրի զարգացմանն ու բարօրությանը: Ինչ վերաբերում է իշխանափոխությանը, այն պետք է լինի ընտրությունների միջոցով, իսկ եթե արտահերթ ընտրություն են ուզում, ուրեմն պետք է առաջարկեն այնպիսի գաղափարներ, որոնց հետեւից մարդիկ կգնան: Իսկ ասել, որ մենք շատ ավելի սիրուն ենք, գեղեցիկ ենք, քան նրանք, դա լուրջ մոտեցում չէ»:
Նա հիշեցրեց. «Մի անգամ մենք տեսել ենք, որ ՀՀՇ-ն էլ ասում էր՝ մենք գալիս ենք իշխանության, պարզապես մենք լավն ենք, այդ լավից հետո տեսանք, թե ինչպիսի արհավիրքներ տեղի ունեցան երկրում: Երկիրը 40 տարով հետ ընկավ իր զարգացման մեջ՝ չհաշված դեմոգրաֆիական խնդիրները եւ այլն: Այնպես որ, հուսով եմ, որ եկող տարի ընդդիմությունն ավելի կոնստրուկտիվ կլինի, իր պարտականությունները կկատարի ԱԺ-ում օրենսդրական, ոչ թե խանգարելու, բոյկոտելու, խճճելու, ներվային իրավիճակ ստեղծելու: Հուսով եմ, որ եկող տարի ընդդիմությունը այնպիսի գաղափարներ հրապարակ կհանի, որոնք ընդունելի կլինեն ամբողջ հասարակության համար: Նաեւ կձեւավորվի համագործակցության մթնոլորտ, գաղափարական բախումներ լինեն, բայց դրանք չպետք է վերածվեն թշնամանքի»: Նա ասաց, որ ընդդիմությունը չպետք է երկրի պետականության նավակը ճոճի, որովհետեւ վստահ պետք է լինի, որ ինքը նույնպես այդ նավակի տակը կմնա:
Կարդացեք նաև
Նա կանխատեսեց, որ եկող տարի ամբողջ աշխարհում լարվածության աճի տարի է լինելու. «Լարվածությունը մեր սահմաններում չի պակասելու, մենք պետք է պատրաստ լինենք դրան: Միաժամանակ մեր բանակը ցույց տվեց իր հզորությունը, ջախջախեց թշնամուն»:
Հռիփսիմե ՋԵԲԵՋՅԱՆ
Վերջնականապես համոզվեցի, որ սահմանային ,,լարումների,, հեղինակը հհկ-ն է`իշխանությունը երկարաձգելու համար…
Ժողովրդի ն ահաբեկելու և իրական ահագնացող խնդիրներից ուշադրությքւն շեղելու համար հհկ ախոռը ամեն ինչի ընդունակ է….
Հայկ Բաբուխանյանը հանգիստ պիտի թողնի հայ ժողովրդին: