«Մարդիկ Նոր տարվա շեմին կանգնել են կոլապսի առջեւ, մի կոպեկ փող չունեն, իսկ կառավարությունը, որը «Նաիրիտին» պարտք է 5 միլիարդ դրամ, 60 միլիոն չգտավ»,- այսօր նախագահական նստավայրի դիմաց «Նաիրիտի» աշխատակիցների բողոքի ակցիայի ժամանակ ասաց գործարանի մամուլի խոսնակ Անուշ Հարությունյանը:
Նա կառավարության երեկվա պատասխանը նաիրիտցիների պահանջներին համարում է արհամարհանք ժողովրդի նկատմամբ. «Չէր կարելի նման կերպ վարվել մարդկանց հետ, որոնք առանց մի կոպեկի են մնացել: Այստեղ հավաքվածներից մոտ 300-ը աշխատանքից ազատվածներ են, որոնք վերջին մեկ ամսվա աշխատավարձը նույնիսկ չեն ստանում: «Նաիրիտն» այսօր դիմում է կառավարությանը, եւ կառավարությունը պետք է կարողանա միջոցներ գտնել մարդկանց խնդիրները լուծելու համար: Եւ անընդհատ շեշտել` գնացեք ձեր սեփականատիրոջից ուզեք, եկեք կառավարություն, ուղղակի հիմք չունի, որովհետեւ կառավարությունը նույնպես սեփականատեր է, 10 տոկոսի սեփականատերն է ու մի քանի անգամ նշվել է, որ նախորդ տարիներին կառավարությունը մեկ լումայի ներդրում էլ չի արել: Միայն սեփականատերն է արել , լավ է արել, թե սխալ է արել, թող ճշտեն իրավապահները: Այս պահին կառավարությունը, որը ձեռքերը լվացել ու քաշվել է «Նաիրիտից», իրավունք չունի էդպես վարվել մարդկանց հետ: Երբ որոշումներ են կայացվում ոչ հօգուտ նաիրիտցիների, կառավարության որոշումների մեջ կա, իսկ երբ աշխատավարձերին է վերաբերում, ուղարկում են ամեն ինչի մոտ, բացի կառավարությունից»:
Նաիրիտցիներին նախագահական նստավայրում դեռ չեն ընդունել:
Արփինե ՍԻՄՈՆՅԱՆ
