«ԵՏՄ մտանք, բայց մենք ի՞նչ ունենք արտահանելու, բացառությամբ մի քանի ապակե տարաներով պահածոներ և ունենք չնչին թեթև արդյունաբերություն: Մեր խնդիրն է օգտվել ԵՏՄ հնարավորություններից, անհրաժեշտ է զարկ տալ տնտեսությանը, ստեղծել նոր աշխատատեղեր և ապահովել փոքր ու միջին բիզնեսի զարգացումը երկրում»,-այսօր «Հենարան» մամուլի ակումբում լրագրողների հետ հանդիպմանը հայտարարեց Կոմունիստական կուսակցության առաջին քարտուղար Տաճատ Սարգսյանը: Նա մտահոգություն հայտնեց, թե մի հանրապետություն, որտեղ բնակիչները փախչում են երկրից, ինչի՞ մասին կարող է խոսք լինել:
Պարոն Սարգսյանն ասաց, թե ամաչում է ՀՀ իշխանությունների փոխարեն ու մանրամասնեց. «Իշխանությունները հայտարարում են, թե մյուս տարվանից թոշակները հինգ-տասը տոկոսով կբարձրանան. ամաչում եմ, բա չե՞ն ասում, թե գների աճը քանի տոկոս է կազմում: Գները առանձին տեղեր 20-30 տոկոսով ավելացել են: Ես նրանց փոխարեն ամաչում եմ»:
Մեր հարցին՝ իսկ չե՞ք ամաչում այն բանի համար, որ բարձրաստիճան իրավապահը կարող է հայտարարել, թե ականջներդ կկտրեմ, բայց աշխատանքից չազատվի, կամ ԵՏՄ-ի որոշման մասին մի ողջ ժողովուրդը իմացավ, երբ որոշումն արդեն կայացվել էր, պարոն Սարգսյանն արձագանքեց. «Առավել ևս ամաչում ենք դրա համար. դա օրինաչափ երևույթ չէ՝ անկախ նրանից, դա տեղի է ունեցել ԱԺ պատգամավորի, թե իրավապահի հետ: Կոմկուսը դատապարտում է այդ վարքագիծը և առաջիկայում սկզբունքորեն նույն դիրքերում կլինի»:
ԵՏՄ անդամակցության որոշման մասին Կոմկուսի առաջին քարտուղարն ասաց. «Դա չի խոսում իշխանությունների աշխատաոճի մասին: Ժողովուրդը տեղին դժգոհեց, որ երկու-երեք տարի իշխանությունները պատրաստվում էին ԵՄ մտնել, հանկարծ ժողովուրդը քնեց արթնացավ, ու տեսավ, որ գնում է ԵՏՄ»: Մեր այն հարցին՝ նույն խնդիրներից դժգոհում են նաև եռյակի ուժերը, ԲՀԿ-ն, ուստի հունվարի 20-ին՝ Գագիկ Ծառուկյանի կազմակերպած խորհրդաժողովին մասնակցելո՞ւ են, պարոն Սարգսյանը պատասխանեց. «Մենք ունենք մեր կարծիքը և ԲՀԿ-ի, և եռյակի գործունեության մասին: Առանձին հարցերի կապակցությամբ, որոնք վերաբերում են արտագաղթի կանխմանը և այլն՝ դրանք նաև կուսակցության ծրագրի մի մասն են կազմում: Ասեմ նաև, որ մենք ԲՀԿ-ից հրավեր չենք ստացել մասնակցության»:
Կարդացեք նաև
Տաթև ՀԱՐՈՒԹՅՈՒՆՅԱՆ
