Ամանորին Ծաղկաձորում եւ Դիլիջանում 5-ից 6 օր հանգստի համար նախատեսված փաթեթների գները սկսում են 200 հազար դրամից եւ հասնում մինչեւ 1 մլն դրամի: Այսօր «Հենարան» ակումբում այս տվյալները ներկայացրեց «Joy Tour» տուրիստական գործակալության տնօրեն Լիլիթ Ալեքսանյանը:
Գործակալության տնօրենի խոսքով՝ փաթեթն իր մեջ ներառում է գիշերակացը, մեկանգամյա սնունդը, ամանորյա ծրագիրը: Մինչդեռ, ըստ բանախոսի, հյուրանոցներում տեղեր դեռեւս կան, քանի որ ոչ բոլորը կարող են իրենց թույլ տալ նման մեծ գումար վճարել հանգստի համար:
Բանախոսը նշում է, որ նման բարձր գնով Հայաստանում հանգստանալու փոխարեն, իրենց հաճախորդները նախընտրում են մեկնել արտերկիր՝ ոչ միայն ավելի մատչելի, այլեւ ավելի բազմազան եւ հետաքրքիր հանգստի համար. «Եթե Եվրոպայի կենտրոնում ես կարող եմ մնալ գիշերը վճարելով 30 եվրո, ապա ես Ծաղկաձոր չեմ գնա այս գումարով: Միայն ավիատոմսի գինն է, որ թանկացնում է փաթեթի գինը»,-նշում է Լիլիթ Ալեքսանյանը:
«Ամանորին մեկ անձի համար Եգիպտոսում, Դուբայում հանգստանալու համար փաթեթի գինը սկսվում է 700 ԱՄՆ դոլարից եւ հասնում մինչեւ 1000 ԱՄՆ դոլար»,-տեղեկացրեց բանախոսը: Իսկ Եվրոպայում երեք աստղանի հյուրանոցում հանգրվանելու համար անհրաժեշտ է վճարել մոտ 800 ԱՄՆ դոլար. «Ամենամատչելի փաթեթները Եգիպտոսում են, այդ իսկ պատճառով մեր քաղաքացիները ավելի շատ նախընտրում են հանգստանալ այնտեղ»:
Կարդացեք նաև
Ինչպես նաեւ հայաստանցիները նախընտրում են ամանորը մեզ մոտ անցկացնելու փոխարեն, մեկ գիշերվա համար 50 ԱՄՆ դոլար վճարելով, անցկացնել իրենց հանգիստը հարեւան Վրաստանում:
Էլյա ՀՈՎՀԱՆՆԻՍՅԱՆ
