Եվրասիական տնտեսական միության պայմանագիրը ստորագրելուց եւ ԵՏՄ լիիրավ անդամ դառնալուց հետո՝ հիմա հայաստանցի պաշտոնյաները հայտարարում են Եվրամիության հետ բանակցությունները վերսկսելու մասին։
Ազգային ժողովի արտաքին հարաբերությունների հանձնաժողովի նախագահ Արտակ Զաքարյանը երեկ մանրամասնել է, թե ի՞նչ բանակցությունների մասին է խոսքը եւ ինչ արդյունքների կարող են բերել դրանք։
– Պարոն Զաքարյան, Եվրոպան, ըստ էության, ասում էր, որ «եւ-եւ» չի կարող լինել ու Հայաստանը պետք է ընտրի կամ ԵՄ-ի, կամ Ռուսաստանի միջեւ: Բայց հիմա, կարծես թե, Հայաստանը նորից վերսկսում է Ասոցացման համաձայնագրի հետ կապված ինչ-որ գործընթաց, ի՞նչ կետից են սկսվելու այդ բանակցությունները եւ ո՞ւր են տանելու։
– Արեւելյան գործընկերության տարածքում տեղի ունեցող գործընթացները, ցավոք, նաեւ բավական տխուր հետեւանքների են բերում։ Դա արդեն իսկ լավագույն ինդիկատորն է այն բանի, որ այս տարածքում ամենաարդարացված եւ ամենաճիշտ, էֆեկտիվ քաղաքականությունը «եւ-եւ»-ի քաղաքականությունն է։ Եթե առաջին մի քանի արձագանքները, որ ունեին ավելի էմոցիոնալ բնույթ, հետագայում վերածվեցին պարզ քաղաքական գործընթացների նկատմամբ ռացիոնալ մոտեցումների, բոլոր կողմերն էլ հասկացան, որ Հայաստանի քաղաքականությունը այս պահի համար միակ հնարավոր, արդարացված, ճիշտ քաղաքականությունն է։
Կարդացեք նաև
Բոլոր վեկտորների զարգացմամբ, բոլոր կողմերի շահերի ներգրավմամբ ու նաեւ սեփական շահերը պաշտպանելու համար համապատասխան հարթակներ ձեւավորելով՝ ՀՀ-ն, ըստ էության, կարողացավ խուսափել ամենատարբեր սպառնալիքներից, առաջ քաշել եւ պաշտպանել իր շահերը եւ ամենակարեւորը՝ հասկանալի եւ վստահելի մնալ իր բոլոր գործընկերների համար։ Ու այսօր մենք, ԵՏՄ-ին անդամակցելով, հայտ ենք ներկայացնում՝ շարունակել ԵՄ-ի հետ համագործակցությունը ոչ թե հայտարարությունների կամ քաղաքականության խորհրդանշական տիրույթներում, այլ իրական քաղաքականության՝ գտնելով, փնտրելով եւ վեր հանելով բոլոր այն հարթակները, որոնք իրականում կծառայեն ՀՀ-ԵՄ կոնկրետ, գործնական հարաբերություններին եւ համագործակցությանը։
– ԵՄ-ի հետ բավական ծավալուն փաստաթուղթ էր բանակցվել, հիմա ո՞ր կետից են սկսվելու բանակցությունները։
– Մենք ունենք տնտեսական ինտեգրման դաշտում նոր ստանձնած պարտավորություններ ԵՏՄ-ի հետ։ Դա մեզ որեւէ կերպ չի սահմանափակում, որպեսզի մեր մյուս գործընկեր պետությունների հետ ե՛ւ երկկողմ, ե՛ւ բազմակողմ ձեւաչափերով ունենանք աշխատանքային գործընթաց եւ երկարատեւ համագործակցություն ու դրա համար՝ իրավաքաղաքական դաշտ։ Բանակցային առարկա կարող են լինել ռեֆորմների, կրթամշակութային, շարժունակության ապահովության, մարդու իրավունքների, տեխնիկական խնդիրների կանոնակարգման, նոր տեխնոլոգիաների, գիտական նորարարության եւ նաեւ առեւտրային որոշ խնդիրների շուրջ համագործակցությունները։ Այսօր արդեն իսկ աշխատանքները սկսված են, եւ ՀՀ-ԵՄ բանակցային գործընթացը առաջիկայում կստանա կոնկրետ ձեւաչափեր, կունենա կոնկրետ դրույթներ, որոնցից շատերը վերցված կլինեն արդեն բանակցված Ասոցացման համաձայնագրից։ Պարզապես՝ դրանք որոշակի շտկումների կամ փոփոխությունների կարիք կունենան։
Լուսինե ԲԱՐՍԵՂՅԱՆ
Հարցազրույցն ամբողջությամբ կարող եք կարդալ «Հայկական ժամանակ» թերթի այսօրվա համարում
