Հայաստան եկած սիրիահայերից ոմանք չեն կարողանում Հայաստանում հարմարվել եւ նախընտրում են կամ հետ գնալ, կամ այլ երկրներ տեղափոխվել, այսօր ՀՀ կառավարության մամուլի սրահում պատասխանելով լրագրողներից մեկի այս դիտարկմանը, Սփյուռքի նախարար Հրանուշ Հակոբյանն ասաց. «17 հազար սիրիահայ է եկել Հայաստան, կարող է մեկը հարմարվի, մեկը չհարմարվի` ընտանեկան, հոգեբանական եւ մի շարք այլ պատճառներով, բայց որ նրանցից որեւէ մեկը չի մնացել առանց օգնության, դա փաստ է»:
Նախարարի մեկնաբանություններն առավել մանրամասն` տեսանյութում
Նախարարը մոտ 40 րոպե ներկայացրեց տարվա ընթացքում իր ղեկավարած ոլորտում տեղի ունեցած-չունեցածը: Թե ինչպես են ծպտյալ, իսլամացած հայերին բացահայտել ու նրանց դարձի բերել, «Արի տուն» ծրագրով տեղացի եւ ոչ տեղացի հայերին ամուսնացրել, անգամ Ղարաբաղից ու Սիսիանից երեխաների «Արի տուն» ծրագրի մասնակից դարձրել եւ այլն: Վստահեցրեց, որ այս տարի ոչ մի ծրագիր չի ձախողվել:
Հրանուշ Հակոբյանից հետաքրքրվեցին նաեւ, թե ի՞նչ եղավ «Նոր Հալեպ» թաղամասի կառուցումը, ի՞նչու նախարարությունը ջանքեր չգործադրեց ներդրողներ գտնելու թաղամասի կառուցման համար, որտեղ պետք է ապրեն Սիրիայից գաղթած հայերը:
Կարդացեք նաև
Տիկին Հակոբյանն ասաց, որ այս «Նոր Հալեպ»-ի ծրագիրը պետական չէ եւ որ սիրիահայերն իրենք են ցանկություն հայտնել ներդրումներով կառուցել իրենց թաղամասը: Նախարարի խոսքերով, կառավարությունը որպես աջակցություն նրանց անհատույց հողատարածքներ է հատկացրել: Հրանուշ Հակոբյանը նաեւ ասաց, որ իրենք չեն կարող «ներդրողների գրպանը մտնել» եւ որ միայն կարող են ներդրողներին հորդորել եւ առաջարկել:
Թե ինչու են «Հայաստան համահայկական հիմնադրամին» կատարվող հանգանակությունները նվազում եւ արդյոք սփյուռքն այլեւս չի վստահում, քանի որ ըստ լրագրողներից մեկի հարցի, այդ գումարներն ուղղվում են բարձրաստիճան պաշտոնյաների բիզնեսների բարգավաճմանը, Հրանուշ Հակոբյանը վստահեցրեց, որ ոչ թե հիմնադրամին չեն վստահում, այլ`սփյուռքահայ մեծահարուստները սկսել են անհատական ներդրումներ անել Հայաստանում եւ այդ գումարները շատ ավելի մեծ են, քան` հանգանակությունները:
Նրա պատասխանի մանրամասները` տեսանյութում
Քեսաբում կրկին իրավիճակը լարված լինելու վերաբերյալ էլ, սփյուռքի նախարարն ասաց, որ խոսել են Քեսաբի գյուղապետի հետ, որն էլ հայտնել է, թե առայժմ լուրեր են եւ ոչ թե գործողություններ:
Լուսինե ԲՈՒԴԱՂՅԱՆ
