Թուրքագետ Ռուբեն Մելքոնյանը այսօր՝ դեկտեմբերի 25-ին, «Հայելի» մամլո ակումբում լրագրողների հետ հանդիպման ընթացքում ասաց, որ 2015 թվականին Թուրքիան ծուղակային իրավիճակներ կստեղծի Հայաստանի համար եւ ներկայումս էլ կան նմանատիպ ծուղակներ:
«Կարծում եմ՝ այդ ծուղակների մի ամբողջ շարք կա, որը վաղուց հովանավորված է, դրա համար վաղուց դրամաշնորհներ են ստացել ե՛ւ Թուրքիայում, ե՛ւ տարբեր այլ վայրերում: Այդ ծրագրերը շարունակվելու են, նրանց մի մասը դրական է, բայց որոշ մասերում կան խիստ վտանգավոր ծուղակներ, որոնք միտված են մեր հասարակական զգոնության թուլացմանը, թյուր պատկերացումների տարածմանը եւ Հայոց ցեղասպանության հարցի իրավական դաշտ տեղափոխելու կասեցմանը, այսինքն՝ ամեն ինչ արվելու է, որ հարցը սահմանափակվի Էրդողանի ցավակցական ուղերձով»,- ասաց թուրքագետը:
Նա համարում է, որ նախեւառաջ հայ ժողովուրդը պետք է հաշվի առնի Թուրքիայում ժողովրդի հասարակական տրամադրությունները, այլ ոչ թե ֆետիշացնի Ստամբուլում կամ Անկարայում ապրող մտավորականների հայտարարությունները:
Անդրադառնալով Ջեմալ փաշայի թոռանը՝ Հասան Ջեմալին, թուրքագետն ասաց. «Հասան Ջեմալը պաշտպանում է նախեւառաջ իր շահերը, քանի որ ինքը Թուրքիայում հայտնի է որպես այլախոհ մտավորական: Երկրորդը պաշտպանում է այն պետության շահերը, որի քաղաքացին է նա, որի կերտողներից է նրա պապը, որի բարիքներից օգտվում է: Մենք Հասան Ջեմալին չպետք է ընկալենք որպես հակաթուրք, Թուրքիայի թշնամի, նրա ամենակարեւոր խնդիրն այն է, որ Թուրքիան դառնա ժողովրդավար, այդ համատեքստում կլուծվի ե՛ւ հայկական հարցը, ե՛ւ քրդական հարցը»:
Կարդացեք նաև
Ամի ՉԻՉԱԿՅԱՆ
