ԱԺ «Ժառանգություն» խմբակցության պատգամավոր Թևան Պողոսյանի համար 2014 թվականի բացասական իրադարձությունները Քեսաբի հայերի հետ կատարված դեպքերն էին ու Հայաստանի անդամակցությունը Եվրասիական տնտեսական միությանը:
«Գնում ենք մի տեղ, ուր հասկանում ենք շատ ու շատ տարբեր խնդիրներ կան: ԵՏՄ-ին անդամակցող ոչ մի երկրում տնտեսության վիճակը լավ չէ»,- այսօր «Հենարան» ակումբում ասաց պատգամավորը:
Որպես կարեւոր իրադարձություն՝ նա առանձնացրեց նաեւ ՄԱԿ-ի գլխավոր ասամբլեայի ժամանակ Սերժ Սարգսյանի ելույթը, որտեղ նախագահը շեշտադրումներ դրեց այն խնդրի վրա, որ Հայաստանը լինելու է տեր ցեղասպանության միջազգային ճանաչման գործընթացում, հատկապես 100-ամյա տարելիցի նախաշեմին, ինչպես նաև ԼՂՀ հիմնախնդրի շեշտադրումները, ինչը Ադրբեջանը փորձում էր միշտ օգտագործել մեր դեմ, շեշտելով, որ բոլոր պայմանավորվածությունների չկատարողը և մեղավորը միայն Ադրբեջանն է»:
Պատգամավորն արձանագրել է, որ տնտեսության մեջ որևէ առաջընթաց չի գրանցվել. «Հույս ունեմ, որ 2015 թվականին մեր սպասված փոփոխությունները կլինեն, սակայն միայն հուսալով բան չի լինի, պետք է նաև աշխատել»:
Կարդացեք նաև
ՀՀԿ խմբակցության պատգամավոր Կարինե Աճեմյանն էլ համոզված է, որ ԵՏՄ-ը կկայանա. «Քանի որ շատ տնտեսագետներ Եվրասիական տնտեսական միության հետ մեր համագործակցության նաև լավ կողմերն են շեշտադրում: Կարծում եմ, որ ճիշտ ու գրագետ աշխատանքի շնորհիվ նաև այս առումով մենք կկարողանանք գրանցել հաջողություններ»:
Արփինե ՍԻՄՈՆՅԱՆ
