«Փոխարժեքի տատանումները կայունացել են, այս պահին փոխանակման կետերում փոխարժեքի գնման եւ վաճառքի տարբերությունները կազմում են 3-5 դրամ, ինչը մեր փոխարժեքի կետերում եղած պատմական ստանդարտ չափի մեջ է»,-այսօր կառավարության նիստի սկզբում ՀՀ վարչապետ Հովիկ Աբրահամյանին ֆինանսական շուկայում իրականացրած մոնիթորինգի արդյունքները ներկայացրեց փոխվարչապետ Վաչե Գաբրիելյանը:
Վարչապետի հանձնարարականով ստեղծվել էր աշխատանքային խումբ՝ շուկայում տիրող իրավիճակն ուսումնասիրելու համար:
Վաչե Գաբրիելյանի խոսքերով՝ դեկտեմբերի 16-17-ին հանրապետությունում փակ են եղել 94 խանութ, քանի որ դրանց տնտեսվարողները սպասումներ են ունեցել: Ըստ նրա, այսօր, սակայն, այդ բոլոր խանութներն աշխատում են. «Բոլոր բաց խանութներում մի պահ կար, որ ապրանքները կային, բայց գնման գինը հստակ նշված չէր: Դա եւս վերացել է, բոլոր տեղերում այդ ապրանքները վաճառվում են հստակ գներով եւ տատանման ենթակա չեն: Մենք նաեւ ստացել ենք տնտեսական մրցակցության պաշտպանության պետական հանձնաժողովի ամենօրյա դիտանցումները, որոնք կատարվել են մի շարք խոշոր խանութներում: Տեղեկատվություն եղավ մամուլում, որ այդ գները, որ ներկայացվում էին, ամբողջովին բնորոշ չէին իրականությանը: Այդ խոշոր խանութներում եւս ամսի 17-ի եղած պիկից զգալիորեն իջել են եւ էլի ունեն կայունության միտում»:
Վաչե Գաբրիելյանը նաեւ տեղեկացրեց, որ կայունացման միտում են դրսեւորել նաեւ գազալցակայանների եւ այլ ոլորտների գները: Վաչե Գաբրիելյանը նշեց, որ աշխատանքային խումբը նաեւ աշխատանքներ է նախաձեռնել մի շարք ուղղություններով:
Կարդացեք նաև
Մասնավորապես, ըստ նրա, Կենտրոնական բանկը կներկայացնի հայեցակարգ փոխանակման կետերի կարգավորման վերաբերյալ, որպեսզի հնարավոր լինի տատանումները հնարավորինս փոքր լինեն:
«Այժմ կարող ենք ուղղակի փաստել, որ թե՛ գների, թե՛ փոխարժեքի տեսակետից մենք ունենք կայուն իրավիճակ, եւ մասնավորապես փոխարժեքի շուկայում տատանողականությունը, որը վերաբերում է գնման եւ վաճառքի տարբերությանը, դա ստանդարտի մեջ է, որը միշտ եղել է, երբ որ շուկան եղել է կայուն»,-ասաց Վաչե Գաբրիելյանը:
Վարչապետ Հովիկ Աբրահամյանը նշեց, որ աշխատանքային խումբը պետք է ունենա երկու ծրագիր ՝ կարճաժամկետ եւ երկարաժամկետ: «Ես կարծում եմ, որ պարբերաբար հանրությանը պետք է տեղեկացնենք գործընթացների մասին»,- նշեց վարչապետը:
Լուսինե ԲՈՒԴԱՂՅԱՆ
Այսինքն Վաչոի կարծիքով փոխարժեքի բարձր լինելը կարևոր չէ
Էփած հավը ծիծաղեց