«Տարին չեղավ այնպիսին, ինչպիսին սպասում էինք»,- այսօր՝ դեկտեմբերի 24-ին, «Տեսակետ» մամլո ակումբում լրագրողների հետ հանդիպման ընթացքում ամփոփելով տարին հայտարարեց «Ապավեն» ընկերության հիմնադիր տնօրեն, ՀՀ ավտոմոբիլային ֆեդերացիայի նախագահ Գագիկ Աղաջանյանը:
Նա նշեց, որ ընկերությունը ծավալների աճ ունի, որը պայմանավորված չէ ապրանքատեսականիների ավելացումով, այլ նկատվում է որոշ ապրանքատեսակների քանակի ավելացում, մասնավորապես՝ լեռնամետալուրգիայի. «Հետաքրքրությունը Հայաստանի լեռնամետալուրգիայի, Հայաստանում արտադրվող ապրանքների նկատմամբ ավելանում է, եւ նրանց աշխարհագրությունը գնալով ընդլայնվում է: Եթե նախկինում մեր փոխադրումները իրականացվում էին հիմնականում սեւծովյան ավազան եւ Միջերկրական ծով, Ռումինիայում եւ Իսպանիայում էին վերամշակում, ապա այժմ ապրանքների զգալի ծավալ սկսել է փոխադրվել Չինաստան, Կորեա»:
Գագիկ Աղաջանյանը, անդրադառնալով աբխազական երկաթուղուն, ասաց, որ առայժմ չի հավատում, որ այն կբացվի: Բայց նա աբխազական երկաթուղու բացումը կապում է Կարս-Ախալքալաք երկաթուղու շահագործման հետ. «Կարս-Ախալքալաք երկաթուղու բացումից հետո անմիջապես առաջանում է աբխազական երկաթուղով թուրքական ապրանքների ուղիղ Ռուսաստան ուղարկելու հնարավորությունը: Նախկինում՝ Սովետական Միության ժամանակ, Սովետական Միության ամբողջ առեւտրատնտեսական հարաբերությունները, առեւտրաշրջանառությունը Թուրքիայի հետ տեղի է ունեցել Հայաստանի տարածքով: Ռուսաստանը իր ապրանքները Թուրքիա եւ Թուրքիան իր ապրանքները Ռուսաստան փորձելու են ուղարկել ամենաէժան փոխադրամիջոցով: Այստեղ ստեղծվում է մի իրավիճակ, որ թուրքական շահերը երկաթուղով Ռուսաստան դուրս գալու համընկնելու են մեր շահերի հետ»:
Ամի ՉԻՉԱԿՅԱՆ
