2015 թվականի գլխավոր գույնը մարսալան (Marsala) է` տաք բորդո-շագանակագույնը, որը, փորձագետների խոսքով, այդ անվանումը ստացել է սիցիլիական նույնանուն գինու պատվին:
Pantone Color Institute հետազոտական ինստիտուտը հայտարարում է, որ մարսալան մարմնավորում է համեղ ընթրիքի հաճույքը, իսկ դրա կարմրաշագանակագույն հիմքը արտացոլանքն է շքեղության ու բնականության:
Համաշխարհային նորաձեւության տները ներկայացրել են 2015 թվականի իրենց հավաքածուները՝ թելադրելով տարվա միտումները:
Անդրադառնալով ազատ ոճի հագուստի` ջինսերի սիրահարներին, համաշխարհային բրենդներն առանձնացրել են գունավոր ջինսերը: Թրենդային են համարվում մուգ գույնի ջինսերը, հատկապես`դարչնագույնը, կարմիրը, մուգ մանուշակագույնը:
Համաշխարհային նորաձեւության գիտակները 2015 թվականի համար խորհուրդ են տալիս նաեւ կաշվե կտորներով զգեստները` տաբատ, բաճկոն, շրջազգեստ, նաեւ երեկոյան զգեստներ` կաշվե կտորներով ու աքսեսուարներով հագեցած:
Կարդացեք նաև
Կոշիկների սիրահարներին էլ խորհուրդ է տրվում կրել մետաղյա աքսեսուարներով հագեցած կոշիկներ: Թրենդային են համարվում արծաթե նրբաթիթեղով, երկար կապիչներով կոշիկները: Բարձրակրունկներն, ինչպես միշտ, նորաձեւ են, սակայն այս տարի կոշիկների նորաձեւության մեջ իրենց ուրույն տեղն են զբաղեցնում սանդալները, մանավանդ՝ կրունկներովը: Աշխարհահռչակ Nicole Miller, Emporio Armani, Giambattista Valli, Moschino-ի հավաքածուները հագեցած են կապիչներով, հյուսվածքներով ու խճաքարերով զարդարված սանդալներով:
Եկող տարվա համար նորաձեւ են նաեւ շարֆերն ու հետաքրքիր ձեւավորմամբ ու օրիգինալ շրջանակներով ակնոցները, որոնք աչքի են ընկնում գունային բազմազանությամբ: Աշխարհահռչակ ապրանքանիշների ստեղծողները հուշում են նաեւ 2015-ի դիմահարդարման գույները: Առաջարկվում է օգտագործել կապույտ, վարդագույն եւ բաց մանուշակագույն ստվերաներկեր, ընդգծելով այտոսկրերը: Ինչ վերաբերում է շրթներկին, ապա խորհուրդ է տրվում օգտագործել մուգ կարմիրը եւ մանուշակագույնի երանգները:
Պատրաստեց
Ե. ՀԱԿՈԲՅԱՆԸ
«Առավոտ» օրաթերթ
23.12.2014
