Ամփոփիչ ասուլիսում Կրթության եւ Գիտության նախարար Արմեն Աշոտյանը Aravot.am-ի հարցին պատասխանելով, անդրադարձել էր «Ունիսոն» հ/կ-ի գործադիր տնօրեն Արմեն Ալավերդյանի այն դիտարկմանը, թե մեր կրթության ոլորտի պաշտոնյաները սխալ պատկերացում ունեն ներառականության գաղափարի մասին, որովհետեւ ներառական կրթություն ասելով, հասկանում են միայն կրթական հաստատության մուտքի մոտ դրված թեքահարթակը: Նախարարն էլ ասել էր, որ ներառական կրթության փաթեթը մշակվել է հենց հաշմանդամության հարցերով զբաղվող հ/կ-ների օգնությամբ, եւ ինքը տարակուսած է, որ նրանք չեն կարողանում միմյանց հետ աշխատել:
Այս առիթով «Ունիսոն» հ/կ-ի գործադիր տնօրեն Արմեն Ալավերդյանն Aravot.am-ին ասաց. «Ես կարող եմ վստահաբար ասել, որ «Ունիսոնի» հետ այդ հարցերը երբեք չեն քննարկվել Կրթության նախարարության կողմից, երբեք չենք մասնակցել նման հայցեակարգերի մշակմանն ու միջոցառումներին: Իմ տեղեկություններով, նաեւ «Անկախ կյանքի հայկական ցանցի» կազմակերպությունների հետ եւս չի քննարկվել: Իսկ այդ ցանցի մեջ մտնում են այնպիսի առաջատար կազմակերպություններ, ինչպիսիք են «Փյունիկը», «Փրկությունը», Հայաստանի խուլերի միավորումը, Հայաստանի կույրերի միությունը եւ այլն: Ես կարող եմ ենթադրել, որ որոշ հ/կ-ների հետ եղել են քննարկումներ, բայց ոչ մեզ հետ, կրկնում եմ, չի եղել:
Երկրորդ, նոր օրենքների, ծրագրերի մասին չեմ ուզում առայժմ կարծիք արտահայտել, մինչեւ չտեսնենք ինչքանո՞վ կիրառական կլինեն ու ոչ ձեւական այդ ծրագրերն ու համակարգը: Ամեն դեպքում ողջունելի է ԿԳ նախարարության այդ մոտեցումը, որ ներառական կրթությունը ոչ միայն թեքահարթակ է, այլ ամբողջ համակարգ: Եվ երբ մենք քննադատություն ենք հնչեցնում, խոսքը վերաբերում է ներկայումս գործող ներառական դպրոցներին, որտեղ շատ հաճախ, եթե չասենք միշտ, մեծամասնության մեջ չկան սուրդո մանկավարժներ, այլ մասնագետներ, չկան պայմաններ կույր երեխաների համար, չկան հարմարեցված սանհանգույցներ՝ սայլակով տեղաշարժվող երեխաների համար: Այդ իմաստով մենք գտնում ենք, որ համակարգը արդյունավետ չի գործում»:
Գոհար ՀԱԿՈԲՅԱՆ
