Հոլիվուդյան հայտնի դերասան Ջորջ Քլունիի կինը՝ Ամալ Քլունին, հաջորդ ամիս Հայաստանը կներկայացնի Եվրոպայի մարդու իրավունքների դատարանում, հայտնում է «Հորիզոն Ուիքլին»:
Ամալ Ռամզի Ալամուդինը Հայաստանը ներկայացնող փաստաբանն է լինելու Փերինչեքն ընդդեմ Շվեյցարիայի գործում, որը լսվելու է ՄԻԵԴ-ի Մեծ պալատում հունվարի 28-ին: Թուրք քաղաքական գործիչ Դողու Փերինչեքը Շվեյցարիայում հայտարարել էր, որ Հայոց ցեղասպանությունը «միջազգային հանրության տարածած կեղծիքներն են», ինչի համար Շվեյցարիայի դատարանը նրան մեղավոր էր ճանաչել ռասիզմի մեջ: Սակայն Փերինչեքի գործը տեղափոխեց ՄԻԵԴ, որտեղ անցած տարվա դեկտեմբերի 17-ի որոշմամբ ընդունվեց, որ այդ արտահայտությունները համապատասխանում են խոսքի ազատության իրավունքին: Այնուհետև Շվեյցարիան բողոքարկեց գործը, իսկ Հայաստանը դիմեց ՄԻԵԴ որպես երրորդ կողմ ներգրավվելու համար:
Լիբանանում ծնված Քլունին Եվրոպական դատարանի գործերում բավական մեծ փորձ ունի: Նա մասնակցել է մի քանի խոշոր դատավարությունների, ինչպիսիք են Վիքիլիքսի հիմնադիր Ջուլիան Ասանժի պաշտպանությունը, Ուկրաինայի նախկին վարչապետ Յուլյա Տիմոշենկոյի գործը, Էլգինի մարմարները Մեծ Բրիտանիայից Հունաստան վերադարձնելու դատը:
Պատրաստեց Հովհաննես ԻՇԽԱՆՅԱՆԸ
