Վերաքննիչ դատարանը մերժեց փաստաբան Հայկ Ալումյանի բողոքը՝ Սյունիքի մարզպետ Սուրիկ Խաչատրյանի խորհրդական Զարզանդ Նիկողոսյանի նկատմամբ համաներման հիմքով քրեական հետապնդում չիրականացնելու որոշումը վերացնելու պահանջով:
Նախագահող դատավոր Համբարձումյանը հրապարակեց մերժման որոշումը՝ առաջին ատյանի դատարանի որոշումը թողնելով ուժի մեջ:
Հիշեցնենք, որ Սյունիքի նախկին մարզպետ Սուրեն Խաչատրյանի տան մոտ տեղի ունեցած միջադեպի ժամանակ թիկնապահ Զարզանդ Նիկողոսյանի և Տիգրան Խաչատրյանի արարքներում ինքնապաշտպանության հետևանքով նրանց քրեական պատասխանատվությունից ազատելու որոշումը ՀՀ ՊՆ քննչական ծառայությունը կայացրել է ՀՀ փաստաբանների պալատի միության նախագահ Ռուբեն Սահակյանի և փաստաբան Մարտին Զիլֆուղարյանի միջնորդության հիման վրա:
Հայկ Ալումյանը մինչեւ դատարանի վճռի հրապարակումը միջնորդեց որպես վկա դատարան հրավիրել Սուրիկ Խաչատրյանին, նրա օգնական Զարզանդ Նիկողոսյանին ու նրա վարորդին: Փաստաբանը վստահեցրեց, որ այդկերպ կկարողանա ապացուցել, որ Զարզանդ Նիկողոսյանն ամենեւին էլ եզակին հոգնակիի հետ շփոթելու խնդիր չունի, այլ իսկապես Բուդաղյանին միայնակ չի ծեծել:
Կարդացեք նաև
«Իմ հանգուցյալ վստահորդը ծեծի է ենթարկվել ոչ այն պարագաներում, որը նկարագրված է քննիչի որոշման մեջ, ոչ այն շարժառիթներով, որը նկարագրված է քննիչի որոշման մեջ եւ ոչ միայն այն անձի կողմից, որը նշված է քննիչի որոշման մեջ»,- ասաց փաստաբանը:
Հիշեցնենք, որ Վերաքննիչ դատարանում այսօր ընթացավ Բուդաղյանների փաստաբան Հայկ Ալումյանի բողոքի քննությունը՝ Սյունիքի մարզպետ Սուրիկ Խաչատրյանի խորհրդական Զարզանդ Նիկողոսյանի նկատմամբ համաներման հիմքով քրեական հետապնդում չիրականացնելու որոշումը վերացնելու պահանջով:
Բայց դատարանը մերժեց՝ հիմնավորելով, որ Վերաքննիչում ապացույցների հետազոտում չեն իրականացնում:
Անդրադառնալով Զարզանդ Նիկողոսյանի հայտարարությանը, որը վերծանվել է Սուրիկ Խաչատրյանի առանձնատան խոհանոցային զրույցի ձայնագրությունից, թե «Ավոյին հավայի տեղը խփին, մփին, ավտոյից իջացրին» արտահայտությանը, Հայկ Ալումյանն ասաց՝ քննիչն ասում է գնահատել են այդ արտահայտությունը, բա ինչո՞ւ այդ գնահատականը չտեսանք որեւէ որոշման մեջ. «Զարզանդը մեկ այլ խոսակցության մեջ ասում է՝ «Չթողին, բա ես ինչ անեմ»: Հարց է առաջանում՝ էդ ո՞ւմ չթողին: Կամ մեկ այլ խոսակցության մեջ պատմում է՝ էս ով է կողս նստած, ասինք դե շեֆ…: Հարց է առաջանում, շեֆն ո՞վ է, ո՞ւմ են շեֆ ասում, եթե ոչ Սուրիկ Խաչատրյանին»:
Պարոն Ալումյանը Aravot.am-ին ասաց, որ այս գործով իրենք դեռ շատ անակնկալներ են պատրաստել:
Մանրամասներն ավելի ուշ
Արփինե ՍԻՄՈՆՅԱՆ
Այսինքն՝ ավտոյի մեջ զարզանդը մենակ ծեծում էր Ավոյին իսկ լիսկան ու մյուսը բերանը ջուր առած նայում էին, կամ քնած էին հանգիստ ու խաբար չէին — վայ գետինը մտնեք ձեր չտեսնված ու չլսված անամոթ հայկական ստերով!
Մարդասպանն ու խուժանը կործանում է Սյունիքը. իբր թե հանքային ու գետային (հէկ-ային) տեռորիզմը քիչ է:
Իսկ Հայաստանի դատարանները քաղաքակա՛ն թատրոններ են. դրա համար նույնիսկ հայերն արդեն Հայաստանում էլ չեն ներդրում: