Կենտրոնական բանկը իր կեցվածքով խաբուսիկ իրավիճակ ստեղծեց վերջին օրերին: Այսօր «Հայացք» ակումբում անդրադառնալով դոլար-դրամ փոխարժեքի տատանումները կարգավորելու պարագայում կենտրոնական բանկի վարած քաղաքականությանը նշեց գործատուների միության նախագահ Գագիկ Մակարյանը:
Պրն Մակարյանի խոսքով՝ պետական համապատասխան կառույցները ոչ մի քայլ չկատարեցին գնաճը զսպելու համար. «Բոլորը ձեռքները լվացին եւ համարեցին, որ գնաճի պրոբլեմը միայն կենտրոնական բանկի խնդիրն է: Այդ սոցիալական պրոբլեմը կոտրվեց ամբողջ հասարակության եւ բիզնեսի գլխին»:
Գագիկ Մակարյանը նաեւ վստահեցնում է, որ դրամի փոխարժեքի կարգավորումը ժամանակավոր բնույթ ունի, իսկ 2015 թվականին ռուսական ռուբլին կգտնվի ներքին հոգեվարքի մեջ. «Ռուսական ռուբլին դոլարի նկատմամբ հազիվ 40-45 ռուբլու մակարդակի վրա կանգնեցվի, որի դեպքում հայկական դրամը երբեք չի իջեցվի 410 դրամի եւ կմնա 430-440 դրամի մակարդակի վրա»:
«Ես միշտ ասել եմ, անկախ նրանից, թե մենք ԵՏՄ կազմում ենք, թե ոչ, մենք կախված են ռուսական տնտեսությունից, եւ եթե ռուբլու հետ պատմություն չլիներ, մենք, կարող է, այս իրավիճակում չհայտնվեինք: Ռուսաստանը զսպեց իր գները, եւ դա միանգամից բացասական ազդեց մեր արտահանման ծավալների վրա: Նաեւ ռուբլու ինֆլյացիան ազդեց մեր տրանսֆերտների վրա»,-նկատեց պրն Մակարյանը:
Կարդացեք նաև
Պրն Մակարյանի խոսքով՝ այս իրավիճակում չերևաց հայկական բանկերի ուժեղությունը. «Հիմա ինչ-որ բանկերի կառավարիչներ հրաժարական են տվել, եւ սա նշանակում է, որ բանկիրները իրենց հոգեբանությամբ այնքան էլ կատարյալ չեն, ինչպես միշտ ներկայացվել են: Եվ եթե բանկային համակարգը տնտեսության կողքին չկանգնեց, տնտեսությունը չի կարողանա առողջանալ»:
Էլյա ՀՈՎՀԱՆՆԻՍՅԱՆ
