«Մենք պետք է հասկանանք, որ այս սահմանադրական բարեփոխումները հետապնդում են մեկ նպատակ՝ իշխանության վերարտադրություն: Եվ վերարտադրության այն մոդելը, որն առաջարկվում է, մեզ համար ընդունելի չի կարող լինել»,- այսօր մի քանի լրատվամիջոցների հետ զրույցում սահմանադրական բարեփոխումների հետ կապված այսպիսի հայտարարություն արեց ՕԵԿ նախագահ Արթուր Բաղդասարյանը:
Ըստ նրա, բարեփոխումների անվան տակ քաղաքական իմիտացիա են անում: Սա չի լինելու «այո»-ի հանրաքվե, սա լինելու «ոչ»-ի հանրաքվե, որովհետեւ երկրի հիմնական քաղաքական ուժերը դեմ են դրան: Մենք սրան աջակցել չենք կարող:
Արթուր Բաղդասարյանը բացատրեց իր հայտարարությունն այսպես. «Ինչու 95-ին ընդունվեց Սահմանադրությունը, որովհետեւ նորանկախ պետություն էինք,եւ պետք է ունենայինք հիմնական օրենքը՝ Սահմանադրությունը: Իսկ ինչո՞ւ փոխվեց 2005-ն, որովհետև այդ ժամանակ ՀՀ-ն անդամակցեց ԵԽ-ին, եւ եթե մենք ընդունում էինք խաղի այդ կանոնները, պարտավոր էինք Սահմանադրության մեջ բարեփոխումներ իրականացնելու: Դրանք պահանջված էին եւ «այո»-ի փոփոխություններ էին: Իսկ ներկայումս մենք չենք կարող աջակցել այդ բարեփոխումներին մի քանի պատճառներով: Յուրաքանչյուր սահմանադրական բարեփոխում նախ եւ առաջ ենթադրում է հասարակական պահանջ: Այսօր ՀՀ-ում հասարակական պահանջ չկա սահմնադրական բարեփոխումների: Այսօր Հայաստանը գտնվում է ծայրաստիճան ծանր սոցիալական վիճակում, եւ դրա համար սահմանադրական բարեփոխումները ոչինչ չարժեն: Երկրորդ հանգամանքը՝ պետք է քաղաքական ուժերի լայն կոնսոլիդացիա: Այսօր երկրի հիմնական քաղաքական ուժերը նման պահանջ չեն դնում: Եվ երրորդը՝ միջազգային օրակարգում չկա նման խնդիր, որ սահմանադրական բարեփոխումներ իրականացնելով՝ կարող ենք նպաստել մեր երկրի ինտեգրացիոն գործընթացներին: Թե ներքին, թե արտաքին քաղաքական իմաստով այսօր այդ բարեփոխումները պահանջված չեն եւ ավելին՝ կարող են վտանգավոր լինել մեր զարգացման համար:2015-ից ԵՏՄ-ի անդամ ենք դառնում, իսկ ԵՏՄ-ն յուրօրինակ համակարգ է, որտեղ որոշում են կայացնում Պուտինը, Նազարբաեւը, Լուկաշենկոն, հիմա միանում է նաեւ Սերժ Սարգսյանը: 4 երկրներ են, որտեղ գերազանցապես գործում է կառավարման նախագահական մոդելը: Այսօր փոխել ՀՀ Սահմանադրությունը,երբ մենք գտնվում ենք մի նախագահական ակումբի մեջ, եւ Հայաստանի նախագահը չի կարող իր երկրի համար որեւէ որոշում կայացնել: Բովանդակությունն էլ իմիտացիոն առաջարկներ են հասարակությանը: Իշխանության ներկայացուցիչները խոսում են, որ սահմանադրական բարեփոխումները մարդու իրավունքների պաշտպանությանն են ուղղված, հիմա հարց՝ արդյո՞ք գործող Սահմանադրությունը խոչընդոտում է, որ մեր երկրում մարդու իրավունքները ավելի լավ պաշտպանվեն, թե խոչընդոտում է, որ տնտեսական զարգացումներն ավելի արդյունավետ լինեն: Իհարկե, ոչ: ԵՏՄ-ում ունենալ լիազորություն չունեցող նախագահ՝ անընդունելի է»:
Կարդացեք նաև
Հռիփսիմե ՋԵԲԵՋՅԱՆ
