Փոխարժեքի տատանումներից «Մարան» ընկերությունը մեծ կորուստներ չի ունեցել: Ընկերության ղեկավար Ավագ Հարությունյանն Aravot.am-ին ասաց, որ դոլարային մուտքերն օգնել են իրենց փոխհատուցել ներքին ցնցումները. «Բայց դրսի մեր գործընկերները չկարողացան պայմանագրային պարտավորությունները կատարել ու վճարել մեզ դոլարով, փող չունեն, վարկ չեն կարողանում ստանալ, դոլար չեն կարողանում գնել: Մեր գործընկերները շատ լուրջ տուժեցին, արդյունքում մեր վճարումները հետաձգվեցին: Այսինքն, ուշացնում են վճարումները, դա էլ ազդում է մեր այստեղի վճարումների վրա: Իսկ այն, ինչ կարողացան ուղարկել, փոխանցեցինք այն 20 տոկոսի կորուստը, որ այս օրերին ունեցանք»:
Վերջին օրերի լարվածությունը պարոն Հարությունյանը սպեկուլյացիա է համարում. «Մի բան ակնհայտ է, որ շատ կարճ ժամանակահատվածում Հայաստանից դուրս եկավ շատ մեծ քանակությամբ փող, որը չէր տեղավորվում առողջ բանականության ու բիզնեսի մեջ: Դիսբալանս առաջացվեց: Արտարժույթի շուկան հենց այն շուկան է, որտեղ սպեկուլյացիաներ են արվում: Պարզապես պետք է պետությունը կարողանա ժամանակին այդ սպեկուլյացիաները ճնշի կամ չթողնի դուրս գան անվերահսկելի դաշտ, սա էր ամբողջ պատմությունը, որ պետությունը չարեց»:
«Մարանի» ղեկավարը մտահոգված է, որովհետեւ առաջիկա տասը օրերին լուրջ կորուստներ են սպասվում. «Ներմուծման ապրանքներն են եկել, երբ երկու ամիս առաջ ներմուծում էինք՝ մաքսային արժեքը հաշվվում էր 405-410 դոլարի կուրսով: Ապրանքները հիմա մաքսակետում են, իսկ մաքսազերծման համար հիմա հաշվում են 510 կուրսով: Արդեն տուժեցինք շատ լուրջ: Մեր խնդրանքն է կառավարությանը` ժամանակավոր ներմուծման ռեժիմ մտցնի այդ ապրանքների վրա, դրանք նախատեսված են դուրս գալու համար: Բայց կառավարությունը չի ուզում լուծել խնդիրը կամ ուզում է լուծել ու ռեսուրսներ չունի լուծելու: Առաջիկա տասը օրում մաքսազերծման գծով 30 տոկոս կորուստ ենք ունենալու»:
Ավագ Հարությունյանի խոսքով, գնաճը ալկոհոլի շուկայի վրա չանդրադարձավ, որովհետեւ այս շուկան արդեն լճացած է, մրցակցությունն էլ` մեծ: Ըստ նրա, գները փոխվեցին միայն այն խմիչքների դեպքում, որոնց ներկրողը շուկայում մենաշնորհային դիրք ունի:
Կարդացեք նաև
Արփինե ՍԻՄՈՆՅԱՆ
