«Կուրսը կկարգավորվի, գուցե շուկայականի կհասնի, ինչքան էլ կառավարությունը փորձի գնաճը զսպել, այնուամենայնիվ, գնաճ ունենալու ենք»,-այսօր «Հայելի» ակումբում լրագրողների հետ հանդիպմանը նման կանխատեսմամբ հանդես եկավ «Ժառանգություն» խմբակցության պատգամավոր Թևան Պողոսյանը: Նա նկատեց, թե պատմության մեջ այնպես է, որ երբ ապրանքի գներն աճում են, հետո շատ դժվարությամբ են նվազում: Ըստ պարոն Պողոսյանի՝ կան սպասումներ, որ կառավարությունը և Կենտրոնական բանկը տիրապետում են իրավիճակին և սկսել են կիրառել գործիքներ և կան խոստումներ, որ կպատժվեն բոլորը: Ըստ Թեւան Պողոսյանի՝ հունվարի վերջին գուցե կրկին նմանատիպ տատանում լինի շուկայում:
ՀՀԿ խմբակցության պատգամավոր Կարինե Աճեմյանը նշեց. «Ամենաբացասականն այս պահին գնաճն էր, բայց այն ունի տարբեր պատճառներ: Ամենակարևորը մեր մենթալիտետն է, անընդհատ կառավարությանը և իշխանությանն ենք մեղադրում, բայց կան հազարավոր խանութների տերեր, որոնք առանց հիմնավորումների և աչքաչափով գներ են բարձրացնում: Մեզ մոտ այս խուճապը համազգային բնույթ է կրում և պիտի կարողանանք ոչ միայն գրագետ ապրել, մեր բյուջեն գրագետ կազմակերպել, այլ մեր հարաբերությունները՝ պետություն –տնտեսվարող ճիշտ կազմակերպենք: ՏՄՊՊ-ն շատ ավելի խիստ վերահսկողություն պիտի սահմանի: Վարչապետի այցը խանութներ կոնկրետ հետևանքներ կունենա»:
Թևան Պողոսյանն այս առիթով նկատեց, թե «Երբ վարչապետը գազալցակայաններում էր, այդ ժամանակ գներն իջեցրել են, հետո երեկոյան գները նորից բարձրացրել են»:
Տաթև ՀԱՐՈՒԹՅՈՒՆՅԱՆ
