«Դեկտեմբերի 11-ից հետո 5-10 տոկոսով որոշ ընկերություններ թանկացրեցին դեղերը, բայց երեկվանից արդեն սկսել են իջեցնել»,-այսօր «Հայելի» ակումբում լրագրողների հետ հանդիպմանը հայտարարեց առողջապահության նախարարի խորհրդական Ղուկաս Ուլիխանյանը:Նա մասնավորապես ասաց. «Մեծածախ ընկերությունները մի քանի շաբաթ չբարձրացրեցին գները: Դեկտեմբերի տասնութին արդեն սկսեցին իջեցնել և այս պահին դեղերի գների իջեցում է գնում»:
Նա նշեց, թե ոչ բոլոր դեղերն էին թանկացել, եղել են դեպքեր, երբ ռուբլիով գնված դեղերն էժանացել էին, առանձին դեպքերում թանկացում եղել է 18 տոկոսով: Պարոն Ուլիխանյանն ասաց, թե ինչքան դրամն արժևորվի, այնքան համապատասխան դեղերի գներն իջնելու են:
Մտահոգություններին, թե ինչո՞ւ են տեղի ունեցել անհարկի թանկացումներ, պարոն Ուլիխանյանը պատասխանեց. «Մեծ մասամբ դեղորայք գնած ընկերությունները հետո են վճարում գնած դեղերի դիմաց, դա է պատճառը, որ արդեն բերված դեղերը թանկացան»:
ԱՆ պաշտոնյան ժողովրդին կոչ արեց այն դեղատներից, որոնք չեն իջեցնի դեղորայքի գինը, դեղորայք չգնել:
Վերջին օրերին մտահոգություններ էին հնչում, թե անվերահսկելի վիճակ էր դեղորայքի շուկայում: Այս առիթով «Դեղերի և բժշկական տեխնոլոգիաների փորձագիտական կենտրոնի» տնօրեն Հակոբ Թոփչյանը ասաց. «Այս ընթացքում մենք աշխատել ենք ռեժիմից դուրս և ամեն ինչ արել, որպեսզի դեղերը հատկացված ժամանակից ուշ չմտնեն Հայաստան»:
Տաթև ՀԱՐՈՒԹՅՈՒՆՅԱՆ
