Հայրենական Մեծ պատերազմի վետերաններն այսօր մասնակցում էին 1941-1942 թվականներին տեղի ունեցած Մոսկվայի Ճակատամարտին նվիրված կլոր սեղանին, որի ընթացքում ներկայացվեց, թե ինչպիսի դերակատարություն են ունեցել հայ վետերանները Մոսկվայի ճակատամարտի եւ, ընդհանրապես, Հայրենական Մեծ պատերազմի ընթացքում:
Aravot.am-ը կլոր սեղանին ներկա տասնյակից ավելի վետերաններից մի քանիսի հետ զրուցեց, թե ինչ խնդիրներ ունեն վետերանները երկրում եւ արդյոք ապրում են այն արժանավայել կյանքով, որն իրենք վաստակել են:
Մեզ հետ զրույցում վետերանները նշեցին, որ Հայաստանում իրենց տրված չեն այն արտոնությունները, որոնք ունեն ԱՊՀ անդամ մյուս երկրներում ապրող պատերազմի մասնակիցները:
Կարդացեք նաև
Օրինակ, Հայրենական պատերազմի վետերան Արտուշ Մկրտչյանը, որը վիրավորվել է 1943 թվականին, սակայն մինչեւ վերջ կռվել է եւ ունի բազմաթիվ պարգեւներ, մեզ հետ զրույցում ասաց, որ ոչ մի արտոնություն էլ տրված չէ պատերազմի մասնակիցներին: Վետերանը պատմում է. «Առհասարակ մեզ՝ վետերաններին լավ չեն նայում, չեն ասում 6 հազարից 7 հազար կմ անցել ենք այս ոտքերով, իսկ իրենք ընդամենը 50-60 կմ-ի վրա այստեղ ոչինչ չեն կարողանում անել»:
Պրն Մկրտչյանի խոսքով՝ անգամ իրենց կենսաթոշակը չի բավարարում, որ, գոնե կարողանան իրենց մինիմալ ծախսերը հոգալ, թանկացումներն էլ մյուս կողմից են անհանգստացնում վետերաններին:
Պատերազմի մեկ այլ մասնակից էլ՝ Բենյամին Միրզոյանը, որն, ի դեպ, Սովետական Միության տարիներին աշխատել է որպես լրագրող, ասաց, որ կուզենար ավելի լավ վերաբերվեն վետերաններին. «Էլ չասեմ, որ ընդհանրապես ուշադրություն չեն դարձնում վետերան ես դու, թե ոչ: Ես պատրաստվում եմ հոդված գրել մեր՝ վետերանների խնդիրների մասին»:
Ըստ մեր զրուցակցի՝ Հայրենական պատերազմի մասնակիցների առողջության պահպանման համար ոչ մի արտոնություն չկա երկրում: Իսկ մյուս խնդիրն էլ, որ ունեն վետերանները, արժանավայել կյանքի պակասն է, ասում է պրն Միրզոյանը. «ԱՊՀ երկրներում խնդիր է դրված, որպեսզի պատերազմի մասնակիցներին ազատեն կոմունալ բնակարանային վարձերից, իսկ մեզ մոտ դա հաշվի չի առնվում: Պատերազմի մասնակիցների մեծ մասը հիմա կարիքավոր են»:
Վետերանները հույս ունեն, որ Հայրենական պատերազմի 70 ամյակին ընդառաջ դրությունը կփոխվի, ընդհանուր միջոցառումներ կլինեն, որոնց նաեւ Հայաստանը կմասնակցի:
Էլյա ՀՈՎՀԱՆՆԻՍՅԱՆ
