«Համաժողովրդական շարժում ՀՀ-ում չկա: Երկու ազդեցիկ հանրահավաք, որոնք իրենց խնդիրները կատարեցին և թույլ չտվեցին սահմանադրական փոփոխությունները»,-այսօր «Հայացք» ակումբում ամփոփելով տարին՝ այսպիսի կարծիք հայտնեց ընտրական տեխնոլոգիաների փորձագետ Արմեն Բադալյանը:
Նա՝ որպես տարվա «նոմինալ իմաստով» փոփոխություն՝ համարեց կառավարության փոփոխությունը: Բայց նաև նկատեց, որ մեկ զանգ նախարարին բավարար է, որ այսուհետ թույլատրվեր պարենային և ոչ պարենային ապրանքների ներկրում տարբեր անձանց կողմից, այլ ոչ թե մեկ հոգի շաքարավազ ներկրի, բայց դա չարվեց: Արմեն Բադալյանը կարևորեց նաև եռյակ-քառյակ-նորից քառյակ գործընթացները:
Հայաստանի՝ ԵՏՄ անդամակցության վերաբերյալ պարոն Բադալյանը հայտարարեց. «Այդ կառույցում ՀՀ-ն վասալային դեր է կատարելու, բայց սա այդ միությունից չէ: Օրինակ՝ Եվրամիությունում Բուլղարիան վասալային երկիր է, քանի որ կամավոր հրաժարվեց գազային հոսքից, որը նրան օդից եկամուտներ էր բերելու»:
Վերլուծաբան, քաղաքական տեխնոլոգ Վիգեն Հակոբյանը նկատեց, թե ՀՀ-ն իր ինքնիշխանությունը վաղուց է կորցրել:Դառնալով ՀՀ կառավարության փոփոխությանը՝ պարոն Հակոբյանը նկատեց, թե ծրագրային և ռազմական առումով որևէ լուրջ փոփոխություններ տեղի չունեցան. «Եթե տնտեսական քաղաքականության հիմքում չկա զարգացում և առաջին հերթին հեղափոխական քայլերի գնալու ցանկություն չկար, ապա մնացած խոսակցությունները եղած ռեսուրսները ավելի արդյունավետ օգտագործելուն են վերաբերում»:
Կարդացեք նաև
Անդրադառնալով փոխարժեքային տատանումներին՝ պարոն Հակոբյանը նշեց, թե դա ցույց տվեց մեր տնտեսության ողբալի վիճակը. «ՀՀ տնտեսությունը չունի իմունիտետ արտաքին և ներքին սպեկուլյացիաների հանդեպ: Մենք տեսնում ենք, որ երբ մոտ տասնհինգ տոկոս ավելի քիչ է արտարժույթ գալիս արտագնա աշխատանքների մեկնած մեր համաքաղաքացիների կողմից, ապա միանգամից դա ազդում է մեր տնտեսության վրա»:
Տաթև ՀԱՐՈՒԹՅՈՒՆՅԱՆ
