Լիազոր մարմինները դեռեւս լռում են. կթանկանա՞ արդյոք գազը՝ պայմանավորված դրամի արժեզրկմամբ, թե ոչ։ ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանն էլ օրերս տեղեկացրել էր, թե հանձնաժողովը «Գազպրոմ Արմենիա» ՓԲԸ-ից դեռեւս չի ստացել գազի սակագինը բարձրացնելու հայտ, այդ պատճառով դժվարացել էր որեւէ կանխատեսում անել։
Հիշեցնենք, որ գազի գնի վերջին բարձրացումից հետո Նազարյանը հայտարարել էր, թե առաջիկա 5 տարիներին գազի գինը չի բարձրանա, վերջին օրերին նա կրկին հաստատեց իր այդ տեսակետը, սակայն չկարողացավ պատասխանել, թե ինչու է գազի գինը թանկացել գազալցակայաններում։ Նկատենք, որ մեկ շաբաթ է՝ Երեւանի բոլոր գազալցակայաններում գազի 1 խորանարդ մետրը թանկացել է 10-30 դրամով, իսկ մարզերում կան գազալցակայաններ, որտեղ ավտոմեքենաների համար նախատեսված գազը թանկացել է մինչեւ 60 դրամով։ Եթե նախկինում գազալցակայաններում 1 խորանարդ մետր գազը վաճառվում էր 190-200 դրամով, ապա այժմ գինը հասել է 230 դրամի եւ դեռ բարձրանալու միտում ունի։
Ակնհայտ է, որ Նազարյանը չի բացում բոլոր փակագծերը եւ խուսափում է հայտարարել բացահայտ փաստերի մասին։ Այդ պատճառով փակագծերը կբացենք մենք։ Տեղեկացնենք, որ գազի վերջին թանկացումների արդյունքում մինչեւ 10 հազար խորանարդ մետր սպառում ունեցող բաժանորդների համար 1 խորանարդ մետր գազի վաճառքը սահմանվել էր 157 դրամով, իսկ, ահա, 10 հազար խորանարդ մետր եւ ավելի սպառում ունեցողների համար յուրաքանչյուր հազար խորանարդ մետրը՝ 278 դոլարին համարժեք դրամով։
Այսինքն, եթե մանրածախ բաժանորդների համար գազի գնի թանկացումը դեռեւս անորոշ է, ապա դրամի արժեզրկմամբ պայմանավորված՝ կարելի է հստակ ասել, որ գազի գինն էականորեն թանկացել է մեծածախ գազ սպառողների, այդ թվում՝ գազալցակայանների համար։
Կարդացեք նաև
Լիլիթ ԼԱԼԱՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
