Դերասան Վարդան Պետրոսյանի պաշտպան Նիկոլայ Բաղդասարյանը, տուժողների ներկայացուցիչ Ռուբեն Բալոյանի հայցը ներկայացնելուց հետո, փորձեց իր դիրքորոշումն արտահայտել:
Բայց մինչ դիրքորոշումը՝ նա ասաց, որ խնդիրն իրավական է, թե պարոն Բալոյանն այդ գումարը պահանջելիս ինչ հաշվարկներ է արել: Ըստ Ն. Բաղդասարյանի, պարոն Բալոյանն այս դատավարության ընթացքում ծառայություններ է մատուցել տուժողներին տարբեր գումարների չափով. «Պարոն Բալոյանը դա դիտո՞ւմ է որպես հանցագործությամբ հետեւանքով անմիջականորեն պատճառված վնաս, թե որպես դատական ծախս»:
Ն. Բաղդասարյանն ասաց, որ մեզանում առկա են նախադեպային որոշումներ Վճռաբեկ դատարանի կողմից այդ հարցի վերաբերյալ, եւ ուզում է իմանալ ինչ գումար է ուզում:
Դատավորն ասաց. «Պարոն Բաղդասարյան, թե ինչ գումար է ուզում, նշված է, թե ինչի համար է ուզում, դա էլ է նշված:Հիմա, թե իրական է, թե իրական չի, փաստաթուղթ ներկայացվել, որ վճարվել է»: Սակայն Ն.Բաղդասարյանը առարկեց, ասելով, թե կա հանցագործության հետեւանքով պատճառված վնաս, եւ դատական ծախս:
Կարդացեք նաև
Դատավորը կոչ արեց, որ տուժողների ներկայացուցիչները կարող են պարզաբանել:
Տուժողների երկրորդ ներկայացուցիչը՝ Զարուհի Վարդանյանն ասաց, որ հայցով տրված են իրավական հիմքերը, որոնք վկայում են, թե անմիջականորեն պատճառված վնասի պահանջ են ներկայացրել, թե որպես դատական ծախս.«Ավելի մանրամասն ձեզ չենք պատասխանի: Այն, ինչ գրված է, գրված է»:
Վարդան Պետրոսյանի պաշտպան Սամվել Ջաղինյանը պարզաբանում պահանջեց դատավորից, թե պարոն Բալոյանը երկու միլիոն երեքհարյուրհիսուն հազար գումա՞ր է պահանջում, Վարդան Պետրոսյանից այս դատավարությանը մասնակցելու համար:
Կրկին աղմուկ բարձրացավ:Իսկ մեղադրող Արթուր Սարգսյանն անհասկանալի համարեց այս խոսակցությունները: Ըստ նրա քաղհայցով բուժծախսերի մասին հայցում միայն երկու տուժողի՝ Տաթեւիկ Հակոբյանի եւ Արթուր Հակոբյանի մասին է, իսկ մնացածների մասով հայցվորը պահանջում է միայն դատական ծախսերը:
Նա նաեւ նշեց, որ տուժող կողմն իր հայցում իրավական հիմքերը նշել է, մասնավորապես, քաղօրենսգրքի 68 հոդվածը, որ հայցի 8-րդ էջում է:
Նիկոլայ Բաղդասարյանն ասաց, որ հուղարկավորության հետ կապված հատուցումը եւս դրված է եղել ապահովագրական ընկերության վրա, մինչեւ երեք միլիոն դրված էր, որը պայմանագրով է, եւ պաշտպանական կողմն ասաց, թե կներկայացնի դատարան:
Նիկոլայ Բաղդասարյանը բերեց մի քանի օրինակներ Ռուբեն Բալոյանի կողմից նույն դատաքննություններին մասնակցելու համար, խոսքը՝ 250 000, 400 000, 1 միլիոն դրամի պահանջի մասին էր:
«Դրա վրա էլ եք խոսո՞ւմ, երկու էրեխուն տվիք սպանիք»,-տեղից սկսեց աղմկել տուժող, ՆԻՎԱ մեքենայի վարորդ Արթուր Հակոբյանը:
Վ.Պետրոսյանի պաշտպան Սամվել Ջաղինյանն առարկեց դատավորի գործողությունների դեմ, ասելով, թե նախագահողն անընդհատ կողմերից դժգոհում է, եթե որեւէ մեկը կարգ է խախտում, ապա նախագահողն է հենց առաջինը խախտում:
-Վարվեք օրենքով,-հորդորեց պաշտպանը:
Ռուզան ՄԻՆԱՍՅԱՆ
