Մի քանի ամիս առաջ «Փոքր եւ միջին ձեռներեցությամբ զբաղվող» միության նախագահ Ստեփան Ասլանյանը վստահեցրել էր, որ եթե ՓՄՁ-ի նկատմամբ պետության վարած քաղաքականությունը նույն կերպ շարունակվի եւ չվերանայվի Շրջանառության հարկի մասին օրենքը, ապա «փոքր ու միջին բիզնեսը կգրանցվի Կարմիր գրքում»:
Այսօր «Հայացք» ակումբում պարոն Ասլանյանն ասաց, որ 2013 թվականից առ այսօր 10 հազար խանութներ արդեն փակվել են եւ տարածքները վարձակալությամբ են տրվում:
Ըստ նրա, երբ այս տարվա հոկտեմբերին ներդրվեց Շրջանառության հարկը, ձեռներեցները հասկացան, որ այն ծուղակ է. «Մենք կողմ ենք 1 տոկոս շրջանառության հարկին, բայց վարչապետին առաջարկեցինք, որ ովքեր կարող են փաստաթղթավորել իրենց բիզնեսը, թող աշխատեն 1 տոկոսով, որոնք չեն կարող` 3,5 տոկոսով: Վարչապետն ասաց` կտեսնենք, բայց ոչ մի փոփոխություն չեղավ, ով տալիս էր փաստաթուղթ, տալիս է, ով այն ժամանակ էլ չէր տալիս, հիմի էլ չի տալիս»:
Ստեփան Ասլանյանն ասաց, որ տարեվերջին կրկին պատրաստվում են ակցիաներ իրականացնելու, եթե ՓՄՁ-ի համար կառավարությունը չփոխի իր «մարտավարությունը»:
Կարդացեք նաև
Անդրադառնալով այս օրերին կատարվող դրամ-դոլար փոխարժեքին, միության նախագահը գտնում է, որ պետությունը պետք է ռազմավարություն մշակեր, որպեսզի մեղմվեր իրավիճակը, մինչդեռ մինչ այսօր որեւէ պետական պաշտոնյա անգամ հայտարարությամբ հանդես չի գալիս, որպեսզի այդպիսի խուճապ չստեղծվի քաղաքացիների շրջանում:
«Գոնե Ռուսաստանի իշխանությունների նման, հայտարարություններով հանդես գան, իրավիճակը պարզաբանեն, տեղեկացնեն՝ ինչ քայլեր են անում, որ վիճակը մեղմեն եւ այլ»:
Ստեփան Ասլանյանի կանխատեսմամբ, 2015 թվականի հունվարից սկսած` ավելի շատ փոքր բիզնեսներ կզբաղվեն:
Ինչ վերաբերում է գազալցակայաններում գազի թանկացմանը, միության նախագահը գտնում է, որ գազի գինը արհեստական է բարձրացվել:
Լուսինե ԲՈՒԴԱՂՅԱՆ
