«Ոչ թե դեմ ենք համաներմանը, փոփոխություններին ԴԱՀԿ-ի հետ կապված գումարների նվազեցնելուն, որոնք կատարվել են հենց մեր առաջարկով, այլ դեմ ենք, որ մեր կարծիքով հակասահմանադրական այն դրույթը, որը թույլ է տալիս արտադատական կարգով սեփականազրկել մեր քաղաքացուն, դա պահպանվում է»,-այսօր ՀՀ ԱԺ արտահերթ նիստի ժամանակ հայտարարեց ՀՀ ԱԺ պատգամավոր Էդմոն Մարուքյանը:
Հիշեցնենք, որ ՀՀ ԱԺ-ն ընդունեց «Վարչարարության հիմունքների և վարչական վարույթի մասին ՀՀ օրենքում լրացումներ կատարելու և կից օրենքում փոփոխություններ կատարելու մասին» նախագծերի փաթեթը, որը ըստ Էդմոն Մարուքյանի և մի շարք այլ պատգամավորների` հակասահմանադրական տարրեր է պարունակում:
Այս առիթով պարոն Մարուքյանը պարզաբանեց. «Ես չգիտեմ `ով վարչական դատավորների հետ դատարանում ինչ է պայմանավորվել, բայց դատարանով անցնելու ընթացակարգը շատ կարևոր է, և Սահմանադրության սկզբունքները որևէ իրավունքի զիջելը չի կարող բխել իրավական պետության շահերից»:
Պարոն Մարուքյանի կարծիքով` դատարանին դիմելու բեռը չպետք է դրվի քաղաքացու վրա: Այնուհետև պարոն Մարուքյանը շեշտեց, թե այն բոլոր դրական փոփոխությունները, որ տեղի են ունեցել օրենքում, կատարվել են հենց իրենց հանձնաժողովի և Արդարադատության նախարարության հետ համատեղ աշխատանքի շնորհիվ:
Կարդացեք նաև
Էդմոն Մարուքյանը եզրափակեց. «Նոր կառավարությունը նրա համար է, որ ամբողջական դրական փոփոխություններ անի , այլ ոչ թե կիսաքայլ անի»:
Տաթև ՀԱՐՈՒԹՅՈՒՆՅԱՆ
