«Սա այնքան էլ արդյունավետ մեխանիզմ չէ մարդու իրավունքների պաշտպանության համար, բայց եթե խորանանք, որեւէ մեկն էլ այդպես կատարյալ չէ մարդու իրավունքները պաշտպանելու համար»,- այսօր՝ դեկտեմբերի 17-ին, «Մեդիա կենտրոնում» լրագրողների հետ հանդիպման ընթացքում, անդրադառնալով ՄԱԿ-ի Համընդհանուր պարբերական դիտարկմանը, ասաց Գյումրու «Ասպարեզ» ակումբի նախագահ Լեւոն Բարսեղյանը:
Նրա խոսքերով՝ դիտարկումը խորհրդատվական գործառույթ ունի եւ որեւէ բան պետություններին չի պարտադրում. պետությունները կամավոր ստանձնում են առաջադրանքների կատարումը: Լեւոն Բարսեղյանը կարեւորում է նաեւ այն, որ դիտարկումը սահմանվում է քաղաքացիական հասարակության մասնակցությունը. «Պետությունը լսումների ընթացքում իր հաշվետվությունը ներկայացնելիս կարող է կանխամտածված շրջանցել ինչ-ինչ հարցեր կամ դրանց մակերեսայնորեն անդրադառնալ, իսկ քաղաքացիական հասարակության այսպիսի մասնակցությունը թույլ է տալիս դրանք բացահայտել, ցույց տալ, որ պետությունը դիտավորյալ ինչ-որ մի բան սքողում է: Օրինակ՝ 2010 թվականին, շատ ծանր տարի էր, մենք ունեինք բազմաթիվ քաղաքական բանտարկյալներ, եւ մերոնք զեկույցով ջանում էին շրջանցել այդ թեմաները եւ քաղբանտարկյալներին ներկայացնել որպես քրեական հանցագործներ, ինչպես գրեթե բոլոր պետությունների քաղբանտարկյալների պարագայում է: Քաղաքացիական հասարակության նախնական, այլընտրանքային կամ ստվերային զեկույցները անդամ երկրներին իրազեկում էին այն մասին, որ այդ մարդիկ քաղաքական բանտարկյալներ են, քրեական հանցագործներ չեն, ինչպես դատախազությունն ուզում է իրենց ներկայացնել»:
Հելսինկյան քաղաքացիական ասամբլեայի Վանաձորի գրասենյակի իրավական վերլուծությունների եւ նախաձեռնությունների բաժնի համակարգող Անահիտ Չիլինգարյանը նշեց, որ արդեն երկրորդ անգամ է, որ ներկայացվում է այլընտրանքային զեկույց. «Դրանք միգուցե ի գիտություն են ընդունվում ՄԱԿ-ի համապատասխան մարմինների կողմից, փաստաթղթերը պատրաստելիս եւ նաեւ դրանց հիման վրա են առաջադրվում հարցեր պետությանը, կառավարությանը դիտարկումը հանձնելիս: Շատ խնդիրներ վեր են հանվում շնորհիվ քաղաքացիական հասարակության, քանի որ պետությունը ներկայացնում է իր զեկույցը դրական կողմից»:
Ամի ՉԻՉԱԿՅԱՆ
Կարդացեք նաև
Լուսանկարը՝ «Մեդիա կենտրոնի»:
