«Ես օդանավակայանից միանգամից եկա այստեղ՝ իմանալով, թե ինչ կարևոր հարց է քննարկվելու»,- քիչ առաջ ՀՀ ԱԺ-ում հայտարարեց ՀԱԿ խմբակցության ղեկավար Լևոն Զուրաբյանը՝ անդրադառնալով ՀՀԿ-ՀՅԴ համատեղ հայտարարությանը՝ կապված ազատամարտիկների և Արամ Մանուկյանի դեմ կատարվածին:
Պարոն Զուրաբյանը դա համարեց «ռեժիմի դեմքը փրկելու ֆարս» ու զգուշացրեց, որ իրենք չեն մասնակցելու և ՀԱԿ խմբակցության պատգամավոր Գագիկ Ջհանգիրյանի ելույթից հետո լքելու են դահլիճը: Այս խոսքերից հետո ՀՀ ԱԺ նախագահ Գալուստ Սահակյանը հայտարարեց. «Քեզ խոսափող էր պետք, հա՞»:
Լևոն Զուրաբյանը վստահեցրեց, որ իր կարծիքով՝ «դահլիճում գտնվող պատգամավորների մեծամասնությունը ոչ միայն որևէ կապ չունի այս քստմնելի բռնարարքների հետ, այլև հոգու խորքում խստորեն դատապարտում է»:
Այնուհետև հարց բարձրացրեց, թե ո՞վ է այս բռնարարքների հետևում կանգնած. «Թե՞ ոմանք փորձում են պնդել, որ սրանց հետևում Սերժ Սարգսյանն ու ռեժիմը կանգնած չեն: Եթե դուք՝ իշխանություններդ, իրականում սրբորեն հարգում եք քաղաքացիական հասարակությունը, ժողովրդավարությունը, ուրեմն ակնհայտ էր, որ բռնություններից հետո ինչ պիտի կատարվեր երկրում: Վովա Գասպարյանը պետք է անմիջապես հրաժարական տար»:
Կարդացեք նաև
Լևոն Զուրաբյանը հիշեցրեց Նախախորհրդարանի մեքենաների վրա հարձակումները, Գևորգ Սաֆարյանի վրա հարձակումը և այն, որ ոստիկանությունը այդ միջադեպերին ծաղրանքով է վերաբերվել: Այնուհետև նշեց, թե «մտքի գիգանտի՝ Վովա Գասպարյանի կարծիքով նման բռնարարքները հենց տեսախցիկների ներքո պիտի կատարվեին»:
Այնուհետև նշեց, թե ազատամարտիկների հետ կատարվածից հետո Լյովա Երանոսյանը անմիջապես պետք է պաշտոնանկ արվեր, բայց նա պաշտոնանկ չի արվել ու նրա և նրա ենթակաների նկատմամբ քրեական գործ չի հարուցվել:
Դառնալով Արամ Մանուկյանի նկատմամբ հարձակմանը՝ հայտարարեց, թե բարեբախտաբար Արամ Մանուկյանի վրա հարձակումը տեսախցիկների ներքո է կատարվել ու ասաց. «Կատարողի դեմքը արձանագրվել է, ու պարզվում է, որ նա առնչակցություն ունի Սերժ Սարգսյանին ամենահավատարիմ համարվող ԱԺ պատգամավորի հետ: Ու այդքանից հետո ԱԺ այդ պատգամավորը չի հարցաքննվում: Ավելին, այդ մարդիկ անմիջապես ազատվում են: Պարզվում է՝ սա մի ռեցիդիվիստ է, և նրան չեն բռնում: Էդ ո՞նց ա մեկը մի դատարկ շշով մյուսին խփել էր, տարիներ բանտում անցկացրեց, թե՞ գործում է կկուի սինդրոմը, երբ մարդ սպանեց նախագահի ախրաննիկը, բայց մեկ ժամ մեղադրյալի աթոռին նստած չեղավ»:
Լևոն Զուրաբյանը եզրափակեց. «Քանի դեռ ու քանի որ այս ամենը չի արվել, ես եզրակացնում եմ, որ դա չի արվել միայն մեկ պատճառով. այս ամենը կատարվել է Սերժ Սարգսյանի անձնական հրամանով, ու այստեղ դուք զբաղված են Սերժ Սարգսյանի ու ռեժիմի դեմքը փրկելու գործով: Սա քաղաքական մեղադրանք է»:
Գալուստ Սահակյանը արձագանքեց. «Նորմալ խոսում ես, խոսի»:
Տաթև ՀԱՐՈՒԹՅՈՒՆՅԱՆ
