2014թ. առնվազն 66 լրագրող է սպանվել, 178-ը՝ բանտարկվել է, իսկ 119 հոգի՝ առևանգվել, այս ցուցանիշներն իր զեկույցում երեքշաբթի հրապարակել է «Լրագրողներ առանց սահմանների» կազմակերպությունը:
Լրագրողների մեծ մասը սպանվել է պատերազմական գոտիներում: Զոհվածներից 66-ը միայն պրոֆեսիոնալ լրագրողների թիվն է, դրան է գումարվում նաև 19 քաղաքացիական լրագրողներ և լրատվական ծառայություններում աշխատող 11 հոգի: Թեև 2014թ. սպանության դեպքերը 7%-ով նվազել են, սակայն նախորդների համեմատ այս տարին առանձնանում էր դաժան սպանություններով, ինչպիսիք են, օրինակ, «Իսլամական պետություն» ահաբեկչական խմբավորման իրականացրած գլխատումները:
«Լրագրողների սպանություն՝ բարբարոսության այսպիսի աշխարհացունց քարոզով, նախկինում չէր եղել», – ասված է զեկույցում:
Ամենաշատ սպանությունները գրանցվել են Սիրիայում (15), Պաղեստինում (7), Ուկրաինայում (6), Իրաքում (4), Լիբյայում (4):
Կարդացեք նաև
Այս տարի զգալի շատացել են լրագրողների առևանգման դեպքերը՝ 30%-ով: Հիմնական դեպքերը գրանցվել են Մերձավոր Արևելքում և Հյուսիսային Աֆրիկայում, սակայն Ուկրաինայի հակամարտությունը ևս առևանգման դեպքերի աճի պատճառ է դարձել:
Այսօր ամբողջ աշխարհում պատանդ է պահվում 40 լրագրող:
Պատրաստեց Հովհաննես ԻՇԽԱՆՅԱՆԸ
