Տավուշի մարզի Ոսկեպար գյուղի 41-ամյա բնակիչ, նախկինում մի քանի անգամ դատված Իշխան Շախմատի Բեգլարյանին մեղադրանք է առաջադրվել այն բանի համար, որ նա 2013թ. մայիսի վերջերին, գիշերվա ժամը մեկի սահմաններում ուրիշի գույքի գաղտնի հափշտակություն կատարելու դիտավորությամբ լուսամուտով մուտք է գործել համագյուղացի Եգոր Գյուլնազարյանի առանձնատուն եւ կատարել գողություն: Նա մեղադրվում է հիշյալ տնից 8500 դրամ արժեքով բենզասղոց, զգեստապահարանից՝ 25 հազար դրամ արժեքով բազմոցի ծածկոց, 4 հատ, ընդհանուր 20 հազար դրամ արժողությամբ կանացի չօգտագործված ներքնազգեստներ գողանալու մեջ, որի հետեւանքով Ե. Գյուլնազարյանին պատճառվել է 53 հազար 500 դրամի նյութական վնաս:
Ըստ «Դատալեքս» կայքի՝ Ի. Բեգլարյանին մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1.1 կետով, նրա նկատմամբ խափանման միջոց է ընտրվել չհեռանալու մասին ստորագրությունը: Սույն քրեական գործով դատավարությունն այսօր մեկնարկել է Տավուշի մարզի առաջին ատյանի դատարանի Իջեւանի նստավայրում:
Ոսկան ՍԱՐԳՍՅԱՆ
