«Կոշիկի Լյուքս» ընկերության ղեկավար Գագիկ Բոստանջյանն այսօր Էկոնոմիկայի նախարարությունում, նախարար Կարեն Ճշմարիտյանին դժգոհեց, որ հայաստանյան բանկերը ռուսական ռուբլին փոխանակելիս, ինչ-որ մարժա են սահմանել, ինչի արդյունքում տեղական արտադրողները տուժում են, եւ այն շահույթը, որը պետք է ստանան ապրանքը արտահանելիս, ռուսականը դրամի վերածելիս՝ այդ շահույթը կորցնում են:
Ի պատասխան Կարեն Ճշմարիտյանն ասաց, որ կզբաղվեն այդ հարցով:
Թեթեւ արդյունաբերողները հանդիպել էին էկոնոմիկայի նախարարին՝ քննարկելու ոլորտի խնդիրները:
«Երամար» ընկերության ներկայացուցիչ Անուշ Սիմոնյանն էլ բարձրացրեց տրանսպորտային ծախսերի հարցը, որոնք տնտեսվարողի վրա բավականին թանկ են արժենում: Ասաց, որ այդ պատճառով շուկաներ ենք կորցնում:
Կարդացեք նաև
Նախարարն ասաց, որ տրանսպորտային ընկերությունների ծախսերը կուսումնասիրեն եւ աջակցման մեխանիզմներ կմտածեն:
Կարեն Ճշմարիտյանի եւ տնտեսվարողի երկխոսությունը՝ տեսանյութում
«Տոսպ» ընկերության համասեփականատեր Ռիմա Բեկիրսկին իր գործունեության ընթացքում չի հիշում մի դեպք, որ հարկայինը «Տոսպին» ստուգի եւ չասի, որ քիչ են վճարում: Նրա խոսքերով, բոլոր հարկուտուրքերը պարտաճանաչ վճարում են եւ բացառապես աշխատում են օրենքի դաշտում, սակայն միեւնույն է հարկայինը դժգոհ է: Տիկին Ռիման խնդիր է տեսնում նաեւ աշխատող ընդունելու օրենսդրությունում.
«Մարդը մտավ, համարվում է աշխատող, ստուգողը եկավ, եթե գրանցված չէ, տուգանում է, բայց պետք է չէ՞ մի քանի օր այդ մարդն աշխատի, տեսնենք կարողանում է այդ գործն անել թե ոչ: Այսինքն՝ ժամանակավոր ռեժիմը չի գործում»:
Նախարարը վստահեցրեց, որ նման խնդիր կարող է բոլոր ոլորտներում էլ առաջանալ եւ խնդիրն, իսկապես, օրենսդրական է:
«Եղվարդի մարզակոշիկների գործարանի» ղեկավար Միշա Ուլիխանյանը նախարարին առաջարկեց մի այնպիսի կառույց ստեղծել, որը կզբաղվի իրացման խնդիրներով, քանի որ արտադրողը չի կարողանում նաեւ ապրանքը վաճառել:
Պարոն Ճշմարիտյանն ասաց, որ ինքն արդեն 15 տարի է այս հարցը բարձրացնում է:
Բոլոր տնտեսվարողների խնդիրները լսելուց հետո, «Բրատեքս» ընկերության ղեկավար Ստեֆանո Ֆաբրիսը նկատեց. «Ճիշտ է գնալ դեպի նոր շուկաներ, բայց դրանք պահանջում են որակյալ ապրանք: Որպեսզի որակյալ ապրանք ստացվի, պետք է այդ արտադրական շղթան կապված լինի մեկը մյուսին որակյալ քայլերով: Դրա համար անհրաժեշտ է ժամանակ, միջավայր, ծաղկուն միջավայր, իսկ այդ ամենն իրականացնելու համար, իհարկե, բավական բաներ պակասում են»:
Կարեն Ճշմարիտյանը իտալացի գործարարին ուշադիր լսեց ու անցավ առաջ:
Լուսինե ԲՈՒԴԱՂՅԱՆ
