Այսօր ոչ իշխանական ուժերի հրավիրած ասուլիսում լրագրողները ԲՀԿ խմբակցության քարտուղար Նաիրա Զոհրաբյանին հարց ուղղեցին՝ հնարավո՞ր է այս բռնությունները՝ Արամ Մանուկյանի, ազատամարտիկների ծեծը, արագացնեն իշխանափոխության շարժումը եւ այդ հարցում ինչո՞վ կարող է օգնել ձեզ ՕԵԿ-ը: Նաիրա Զոհրաբյանը չպատասխանեց:
ՕԵԿ պատգամավոր Մհեր Շահգելդյանը պատասխանեց, որ «ՕԵԿ-ը հստակ ներկայացրել է իր մոտեցումները եւ մենք այսօր գտնում ենք, որ արտահերթ նիստ պետք է հրավիրվի: ՕԵԿ-ի օգնել-չօգնելու հետ կապված հարցը ճիշտ չի ձեւակերպված: Մենք խնդիր ենք տեսնում տվյալ իրավիճակում եւ հստակ արտահայտում ենք այն»:
Նաիրա Զոհրաբյանի խոսքերով՝ «Այն, որ Հայաստանում պիտի անպայման լինի իշխանափոխություն, որովհետեւ երկիրը կանգնած է լրջագույն ճգնաժամային իրավիճակի առջեւ բոլոր ոլորտներում՝ այստեղ երկու կարծիք չի կարող լինել: Բայց մենք չենք կարող առաջնորդվել որքան վատ, այդքան լավ սկզբունքով, որ ինչքան շատ վատ բաներ լինեն, արագացնեն իշխանափոխության պրոցեսը: Երկիրն այնպիսի լրջագույն խնդիրների առաջ է կանգնած, որ այս ամենը բավարար է՝ իշխանափոխություն իրականացնելու համար»:
Նա ասաց, որ ցավում է, որ կեղծ հայրենասերներ են հայտնվում եւ իրականացնում իրենց հայրենասիրական ակցիաները. «Ծիծաղելի է, անպատվաբեր է նման վարկածներ քննարկելը»:
Կարդացեք նաև
ՀԱԿ խմբակցության պատգամավոր Գագիկ Ջհանգիրյանն ասաց, որ բռնությունները նպատակ ունեն վախեցնել, ահաբեկել քաղաքական ուժերին, հետ պահել իրենց քաղաքական պայքարից. «Հիմա վախեցրել են, թե ոչ՝ Արամ Մանուկյանը կոնկրետ վախեցած չէր: Երեկ մոտն եմ եղել, վախեցած չէր: Կարծում եմ, մինչեւ հիմա բռնություններով պահել են իշխանությունը: Քանի որ իշխանությունն ինքն ածանցված է ժողովրդից, ժողովուրդն ազատ է իր քվեն տալու հարցում, որեւէ մեկը չի կարող նրա վզին փաթաթել այլ իշխանություն, քան այն, ինչը ցանկանում է ժողովուրդը»:
Հռիփսիմե ՋԵԲԵՋՅԱՆ
