ՀՀ ԱԺ-ն քննարկում է «Վարչարարության հիմունքների եւ վարչական վարույթի մասին» ՀՀ օրենքում փոփոխություններ եւ լրացումներ կատարելու մասին օրենքի նախագիծը : ՀՅԴ խմբակցության պատգամավոր Արծվիկ Մինասյանը ամբիոնից հայտարարեց, թե «այս հարցն արդեն դեժավյու է դարձել, այնքան է քննարկվել»: Այնուհետև շեշտեց, թե միևնույն է, որ «այն այնքան արդիական է, որ ուզենք, թե` ոչ, ցանկացած առիթ օգտագործվելու է ևս մեկ անգամ բարձրաձայնելու խնդիրը»: Հետո էլ հիշեցրեց, թե «սա այն նախագիծն է, որն արդեն մեկ անգամ խորհրդարանի կողմից չընդունվեց: ԱԺ է բերվել նրա համար, որ որոշակի փոփոխությունների է ենթարկվել և թեթևացում է առաջարկում, բայց սկզբունքորեն իրավական վեճը մնում է, հարցը մնում է չփակված»: Արծվիկ Մինասյանը շեշտեց, թե «դեմ» են այս նախաձեռնությանը և « դեմ» են քվեարկելու` «հավատով ու հույսով, որ կգանք մի ընդհանուր եզրակացության, որ մարդու սեփականության իրավունքը ենթակա է պաշտպանության և այն չի ենթադրում որևէ վարչական վարույթ և իրավական գերատեսչությունը չի կարող վերցնել ու իր որոշմամբ քաղաքացուն զրկել այս իրավունքից»:
Հիշեցնենք, որ այս օրենքը բազմաթիվ մտահոգությունների առարկա է դարձել` մասնավորապես ԴԱՀԿ-ի բռնագանձումների հետ կապված: Սուքիաս Ավետիսյանը այս առիթով իր ելույթում շեշտեց, թե «որտե՞ղ է մեր ընդդիմությունը և չի գալիս մասնակցում քվեարկությանը, եթե այդքան մտածում են ժողովրդի մասին»: Այնուհետև պարոն Ավետիսյանը շարունակեց. «Երբ Գյումրիի խնդիրների մասին էինք խոսում, նրանք չէին մասնակցում այդ քվեարկությանը: Այն անձը, որն ընդամենը մի քանի օր առաջ իր քաղաքական ուժի ողջ էլիտայով եկել-հավաքել էր Գյումրիում, միտինգ էր անում, հիմա այդ օրենքին դե՞մ է քվեարկել: Դա վերաբերում է «Ժառանգությանը»: Հիմա դե թող իմանան, մե՞նք ենք ժողովրդի մասին մտածում, լավ գործ անում, թե՞ բոյկոտողները: Այս մասին պիտի բարձրաձայնենք ու ժողովրդին ասենք` ով է իրականում մտածում ժողովրդի մասին, ով ընդամենը զբաղվում է քաղաքական ինտրիգներով և այս կարևոր հարցերի քննարկումներին և քվեարկություններին չեն մասնակցում»: ՀՀ արդարադատության նախարարի առաջին տեղակալ Արսեն Մկրտչյանը արձագանքեց. «Առաջարկում եմ Սահմանադրության հետ կապված իրավական վեճին այս փուլում չանդրադառնալ»:
Տաթև ՀԱՐՈՒԹՅՈՒՆՅԱՆ
