ՍԴՀԿ ատենապետ Նարեկ Գալստյանը զազրելի երեւույթ է համարում ազատամարտիկների, ակտիվիստների եւ ՀԱԿ պատգամավոր Արամ Մանուկյանի վրա հարձակումները։ Այսօր «Հենարան» ակումբում լրագրողների հետ հանդիպմանը Նարեկ Գալստյանն ասաց, որ դատապարտելի է, երբ քաղաքական գործչի, ազատամարտիկի կամ յուրաքանչյուր անհատի իր արտահայտած քաղաքական հայացքների համար ծեծի են ենթարկում. «Հույս ունենք, որ պատկան մարմինները կբացահայտեն եւ արժանի կերպով կպատժեն այդ գործողություններն իրականացնողներին»։
Ըստ նրա՝ «հավ գողացողին կարող են երկու-երեք տարով դատապարտել, իսկ քաղաքական գործիչների վրա հարձակվողներին բաց են թողնում»։
Անդրադառնալով դրամի փոխարժեքի տատանումներին, Նարեկ Գալստյանը նշեց, որ դա խոսում է պետության կարգավորող ֆունկցիաների բացակայության մասին. «Ես նայում եմ, թե Կենտրոնական բանկի նախագահը ինչպես հայտարարեց, թե ագրեսիվ քաղաքականություն կվարեն եւ կկարգավորեն խնդիրը, սակայն ո՞ւր է այդ ագրեսիվ քաղաքականությունը, ո՞րն է մեր պետության կարգավորող ֆունկցիան։ Եթե ամբողջ աշխարհում բենզինն էժանանում է, ինչո՞ւ է մեզ մոտ թանկանում։Սրանք խայտառակ երեւույթներ են, որոնք խոսում են իշխանությունների ոչ պատշաճ մոտեցման կամ իշխանությունների մեծ գումարներ շահելու մոլուցքի մասին, որը դատապարտելի է»։
Նարեկ Գալստյանի խոսքով՝ տնտեսական այս դրությունը լավ բանի չի կարող հանգեցնել. «Դրա համար պետք չէ զարմանալ, թե ինչու է ժողովուրդը գնում ինչ-որ օլիգարխի հանրահավաքին եւ սատարում նրան, որը մինչեւ 2012 թվականը իշխանության մաս էր կազմում»։
Կարդացեք նաև
Բանախոսը նաեւ տեղեկացրեց, որ Սոցիալ դեմոկրատ հնչակյան կուսակցությունը 2015 թվականին հանրահավաքներ կանցկացնի։
Էլյա ՀՈՎՀԱՆՆԻՍՅԱՆ
