«Արամ Մանուկյանին եմ ասում՝ սա է ԵՏՄ-ն, ահա, քո կողմ քվեարկած Ռուսաստանը սա է: Մի վազեք եվրոպական պետությունների դեսպանների մոտ, եթե կողմ եք քվեարկում, ժողովրդին էլ ասում եք՝ դա անխուսափելի է, դա էր մեր ապագան, ապա իմացեք, որ ԵՏՄ-ում գործող ձեւերը ձեր դեմ են լինելու…Գնացեք Պուտինին խնդրեք, որ զանգեն մեր իշխանություններին, որ նման բաներ չլինեն»,- «Հայելի» ակումբում ասաց ՀՀՇ նախկին անդամ Հովհաննես Իգիթյանը՝ անդրադառնալով ՀԱԿ խմբակցության քարտուղար Արամ Մանուկյանի վրա հարձակման դեպքին:
ԱԺ ՀՀԿ-ական պատգամավոր Մանվել Բադեյանն էլ ասաց, որ ազատամարտիկների ու պատգամավորի վրա հարձակման դեպքերի դրդապատճառները պետք է հասկանալ. «Չփորձենք պիտակներ կպցնել ինչ-որ ուժերի կամ ինչ-որ մարդկանց վրա՝ կախված, թե այդ պահին ինչ է ձեզ ձեռնտու ասել: Շատ հանգիստ ու հանգամանորեն, արհեստավարժ հետաքննություն անցկացնել ու տեսնել՝ յուրաքանչյուր դեպքում ինչն է ծեծկռտուքների դրդապատճառը եղել, արդյոք մի կենտրոնից են ուղղորդված ու փոխկապակցված, թե՞՝ ոչ: Ցանկացած այլ ենթադրություն սպեկուլյատիվ բնույթ է կրում: Պետք է պարզվի՝ ովքեր են: Բոլոր դեպքերում դատապարտելի է ցանկացած բռնություն»:
Անդրադառնալով Իգիթյանի ասածներին՝ թե «ԵՏՄ-ին կողմ քվեարկեցիք, ստացեք»՝Մանվել Բադեյանն ասաց. «Վաղը եղանակը վատ լինի, կարող եք ասել՝ այ ԵՏՄ մտաք, դրա համար է եղանակը վատ, ԵՏՄ մտաք, դրա համար երկրաշարժ եղավ, եսիմ ինչեր եղան:
Յուրաքանչյուր երկիր պետք է ձգտի ինտեգրացիոն գործընթացների, չկա որեւէ փոքր երկիր, որը ինտեգրված չէ որեւէ տնտեսական կառույցի: Մենք հայտարարել էինք, որ ինտեգրվում ենք Եվրոպական միությանը, բայց այդ Եվրոպան չտվեց որեւէ երաշխիք, որ ծանր ու թեթեւ անելով ընտրեինք Եվրոպական ինտեգրումը այս պահին, դա բացարձակապես չի բացառում, որ հաջորդ պահին ընդգրկվենք եվրոպական ինտեգրացիոն գործընթացի մեջ: Մի մոռացեք ժամանակը, երբ ԵՏՄ-ին միանալու մասին որոշումը կայացրինք:
Կարդացեք նաև
Չկային ուկրաինական դեպքեր, սանկցիաներ, Արեւմուտք-Ռուսաստան հակամարտությունը: Ռուսաստանն էլ հայտարարում էր, որ ԵՏՄ-ն մի օր ընդգրկվելու է եվրոպական ինտեգրացիոն գործընթացների մեջ: Որեւէ հակասություն չեմ տեսնում, որ ընդգրկվեցինք ԵՏՄ»:
Հովհաննես Իգիթյանն էլ ասաց, որ Մանվել Բադեյանի ասածները չեն համապատասխանում ՀՀԿ-ի դիրքորոշմանը:
Նրա խոսքով, նախկինում, երբ Սերժ Սարգսյանն ասում էր՝ գնում եմ Եվրոպական միություն, ՀՀԿ-ականներն ասում էին՝ ճիշտ է մեր նախագահը, գնում ենք. «Հիմա ասում է՝ գնում ենք ԵՏՄ, ասում եք, ճիշտ է, գնում ենք դեպի Ռուսաստան, եթե վաղը Սերժ Սարգսյանը հայտարարի, որ գնում ենք Չինաստան, բոլորդ կասեք՝ ճիշտ է մեր նախագահը, գնում ենք Չինաստան: Մի վիրավորվեք, սա վերաբերում է թե ձեզ, թե իրենց ոչ իշխանական ուժ համարողներին, որոնք թութակի պես կրկնում են իրենց առաջնորդի ասածները ու վերլուծությունը բացակայում է: Երաշխիքների մասին եք խոսում, բայց երաշխիքներ չկան: Անվտանգության երաշխիքները ՀԱՊԿ-ի պայմանագրով են լուծված: Խոսքը գնում էր՝ մեր ապրանքը ինչ չափանիշների պետք է համապատասխանի… Գնում ենք մի կառույց անվտանգության երաշխիքների համար, բայց արդյոք Հայաստանի այս քայլը Հայաստանին ու Ղարաբաղին տալի՞ս է ռազմական երաշխիք, ես գտնում եմ՝ ոչ, բոլոր երեւույթները, որ տեղի են ունեցել վերջին ամիսներին, ցույց են տալիս, որ այսօր ԼՂՀ անվտանգության հարցը ավելի բարձր չի եղել, քան հիմա»:
Նա նաեւ Մանվել Բադեյանից հարցրեց՝ ու՞ր են ՀԱՊԿ-ի ուժերը, երբ սահմանին ադրբեջանական դիվերսիոն խմբերն են գործում, ուր էր, երբ հայկական ուղղաթիռը խփեցին:
«Ի՞նչ անեն, գան, մտնեն Ղարաբա՞ղ»,- հարցրեց Մանվել Բադեյանը:
Իգիթյանն էլ ասաց՝ գոնե ՀԱՊԿ-ից կարճ տեղեկություն տարածեն, որ Հայաստանի անվտանգության հարցով քննարկում է եղել, եթե լինում է նման քննարկում:
Արփինե ՍԻՄՈՆՅԱՆ
