Արժութային շուկան կայունացնելու ուղղությամբ Կենտրոնական բանկի ձեռնարկած քայլերի արդյունավետությունն առայժմ չափազանց ցածր է եւ տեսանելի չէ։ Արդեն հնչում են մասնագիտական կարծիքներ, որ այդ գործողություններից շուկան ավելի շատ տուժում է, քան շահում։
Մինչ ԿԲ-ն հույս ուներ, որ վիճակը շուտ կկարգավորվի, եւ կվերականգնվի հավասարակշռությունը, դա ոչ մի կերպ տեղի չի ունենում։ Եվ սա այն դեպքում, երբ դեկտեմբերի 4-ին տեղի ունեցած կառավարության նիստում ԿԲ նախագահի տեղակալը հայտարարեց, որ «գործի են դրվել Կենտրոնական բանկի տրամադրության տակ գտնվող բոլոր հնարավոր գործիքները եւ միջոցները»։
Եթե դրանց ազդեցությունը շուկայի կայունացման եւ հավասարակշռության վերականգնման վրա այսպիսին է, ապա կարելի է ասել, որ գոնե ստեղծված իրավիճակում դրանք չաշխատող միջոցներ են։
Կտրուկ բարձրացնելով լոմբարդային ռեպոյի տոկոսադրույքը՝ ԿԲ-ն փորձեց բանկերում դրամային սով առաջացնել, որպեսզի ստիպի նրանց կուտակած տարադրամային միջոցների մի մասը վերադարձնել շուկա եւ սպասարկել իրենց պարտավորությունները։ Սակայն դա տեղի չունեցավ։ Բանկերը շարունակում են խուսափել տարադրամային միջոցների իրացումից։
Կարդացեք նաև
Վիճակը չփոխեց նաեւ տարադրամի հրապարակային սակարկությունների իրականացումը։ Որպես այդպիսին, այդ գործիքը մինչեւ այժմ Հայաստանում չէր կիրառվել։ Թեեւ հիմնվելով հարեւան երկրի փորձի վրա, ԿԲ-ն դրա հետ լուրջ հույսեր էր կապում։ Ենթադրվում էր, որ սակարկությունների իրականացումից կարճ ժամանակ անց շուկայում կվերականգնվի հավասարակշռությունը, հետեւաբար նաեւ՝ փոխարժեքների կայունությունը։
Վասակ ԹԱՐՓՈՇՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
