ԱԺ պատգամավոր Վարդան Այվազյանը վստահ է, որ փոխարժեքի տատանումները գնաճի միակ նախապայմանը չեն կարող լինել: Այսօր լրագրողների հետ հանդիպման ժամանակ պատգամավորը հարց բարձրացրեց՝ եթե գնաճը կախված է փոխարժեքի տատանումներից, այդ դեպքում ինչո՞ւ են թանկանում տեղական ապրանքները:
Լրագրողների դիտարկմանը, թե այսինքն իր մոտ էլ են հարցեր ծագում գնաճի վերաբերյալ, Վ. Այվազյանը պատասխանեց. «Իսկ ինչու ես մարդ չե՞մ, ասեմ ձեզ ես էլ նույն առեւտուրն եմ անում, ինձ համար էլ հարցեր կան, որ պարզ չեն»:
Պատգամավորի խոսքով՝ գնաճը բազմագործոն է. «Պետք է ուսումնասիրել ամբողջ դաշտը, այդ թվում պետք է ուսումնասիրել ողջ սպեկուլյատիվ դաշտը՝ սկսած սպեկուլյատիվ բանկերից, վերջացրած վաճառողներից: Կանոնակարգված ձեւ կա, երբ մարդ կարող է իր ապրանքը թանկացնել, երբ ինքը գտնվում է գերիշխող դիրքում»:
Պատգամավորի խոսքով՝ Կենտրոնական բանկը կարող էր զսպել միայն դոլար-դրամ հարաբերությունը. «Բանկը չունի այդ գործիքը գնաճը զսպելու համար»:
Կարդացեք նաև
Ասուլիսին ներկա Դեմոկրատական կուսակցության նախագահ Արամ Սարգսյանն էլ հետաքրքրվեց, թե ինչո՞ւ կառավարությունից չեն պահանջում այն գործառույթները, որով այն կարող է գնաճի հարցում կարգավորիչ դեր խաղալ. «Դուք ամեն ինչ ճշմարիտ ասացիք, սակայն հարց է առաջանում, ո՞վ պետք է այս երկրում կարգավորի գնաճը: Դուք այս համակարգով ոչինչ չեք կարող փոխել»:
Էլյա ՀՈՎՀԱՆՆԻՍՅԱՆ
