«Դեմ լինելով ԵՏՄ-ին անդամակցության ողջ փաթեթին` ինձ հետաքրքրում է` որտեղից այս շտապողականությունը, թըթ-շըփ, մեկօրյա, 24-ժամյա, արտահերթ ռեժիմով, ուզում ենք այս գործընթացն անել ու դեռ հասկանալի չէ, թե մեր գործընկերներն ուզում են վավերացնել, թե ոչ»,-այսօր ՀՀ ԱԺ արտահերթ նիստի ընթացքում հայտարարեց պատգամավոր Ալեքսանդր Արզումանյանը:
Նշենք, որ թեև ոչ իշխանական խմբակցությունները բոյկոտել էին նիստը, սակայն որոշ պատգամավորներ վերադարձել են խորհրդարան: Այս առիթով ԱԺ փոխնախագահ Էդուարդ Շարմազանովը նշեց, թե լավ է, որ «մեր ընդդիմադիր գործընկերներն աշխատում են մեզ հետ»:
Պարոն Արզումանյանը համարում է, որ քաղաքական այս գործընթացը թևակոխել է շուկայական փուլ, քանի որ «Ամանորին ընդառաջ՝ մեր երկու գործընկերները փորձում են առավելագույնը պոկել ՌԴ-ից; Այս պայմաններում ավելի ճիշտ չէ՞ր լինի մենք էլ բազարների մեջ մտնեինք և փորձեիք առավելագույն բաներ քաղել: Մոտավորապես այսպես` այս կտաք` կվավերացնենք, չեք տա, չենք վավերացնի: Իսկ մենք խելոք աշակերտի նման մեր տնային աշխատանքն ենք կատարում: Ո՞ւր ենք շտապում»:
Նույն մտահոգությունը հնչեցրեց ԱԺ պատգամավոր Խաչատուր Քոքոբելյանը. «Ո՞րն էր պատճառը շտապելու` չհասցրինք օրենքը լուրջ քննարկել, ակնհայտ է, որ մինչև հունվարի 2-ը չի վավերացվելու այս պայմանագիրը Ղազախստանի և Բելառուսի կողմից և մենք շտապելով քաղաքական առումով ուզում ենք օր առաջ սա հաստատված լինի: Չեք կարծո՞ւմ, որ զուտ քաղաքական առումով նպատակահարմար կլիներ սպասել, որ վավերացնեինք, հետո անցնեինք այս գործընթացին»:
Կարդացեք նաև
ՀՀ ֆինանսների նախարարի տեղակալ Վախթանգ Միրումյանը պատասխանեց. «Իհարկե, մենք փորձում ենք ապահովել մեր ողջ իրավական դաշտը հնարավորինս սեղմ ժամկետում մեզ համար: Նպատակը անդամակցության առավելություններից հնարավորինս շուտ օգտվելն է»:
Տաթև ՀԱՐՈՒԹՅՈՒՆՅԱՆ
