«Վրաստանը Հայաստանի համար շատ կարեւոր դաշնակից է: Մեր ապրանքաշրջանառության 60-70 տոկոսը իրականացնում ենք Վրաստանի միջոցով՝ որպես տրանզիտային երկիր, ուստի հայ-վրացական հարաբերությունները շատ ավելի կարեւոր են, քան այլ երկրների հետ կապերը»,-այսօր «Հայելի» ակումբում անդրադառնալով վարչապետ Հովիկ Աբրահամյանի Վրաստան կատարած այցին եւ ձեռք բերած պայմանավորվածություններին, նշեց ԱԺ պատգամավոր Վարդան Այվազյանը:
Ըստ պատգամավորի՝ վարչապետի այցը լուրջ ազդեցություն ունեցավ՝ փոխշահավետ պայմանավորվածությունների առումով:
Վարդան Այվազյանը կարեւորեց այն հանգամանքը, որ Վրաստանը ինտեգրվում է Եվրամիություն, իսկ Հայաստանը՝ Եվրասիական Տնտեսական Միություն, սակայն նշեց, որ Հայաստանի՝ ԵՏՄ անդամակցությունը չի փակի ճանապարհը դեպի ազատ-համապարփակ առեւտուրը. «Երկու երկրների վարչապետները այս կերպ պատմական քայլ կատարեցին՝ ցույց տալով, թե ինչպես երկու տարբեր կառույցների անդամներ կարող են միմյանց հետ համագործակցել»:
Վարդան Այվազյանը տեղեկացրեց, որ համաձայնություն է ձեռք բերվել, որ Վրաստանի եւ Հայաստանի միջեւ ազատ առեւտրի պայմանները պահպանվում են, այն ռեժիմով, որ գործել են նախկինում. «Հայաստանի ապրանքը զրոյական մաքսատուրքով անցնելու է Վրաստանի տարածք եւ հակառակը»:
Կարդացեք նաև
Էլյա ՀՈՎՀԱՆՆԻՍՅԱՆ
