«Ամբողջությամբ չպայմանավորվեցինք, ընդհանուր մտահոգություն կար: Որոշեցինք առայժմ, որ 6.30-ին այսօր արտահերթ նիստ պետք է հրավիրենք, որը պետք է անդրադառնա ՀՀ-ում այս ամենաթողությանը, որի ժամանակ ընդունվի հայտարարություն: Մանրամասները դեռ չենք քննարկել: Անհրաժեշտ է , որ օրենսդիր մարմինը իր հստակ գնահատականն արտահայտի»,- այսօր ԱԺ նախագահ Գալուստ Սահակյանի հետ ոչ իշխանական ուժերի հետ խորհրդակցությունից հետո լրագրողների հետ զրույցում ասաց «Ժառանգություն» խմբակցության ղեկավար Ռուբեն Հակոբյանը:
Հիշեցնենք, որ ոչ իշխանական ուժերը պահանջում էին գնահատական տալ Արամ Մանուկյանի հետ կատարված միջադեպին եւ քննարկել երկրում ստեղծված իրավիճակը:
Ռուբեն Հակոբյանն ասաց, որ քանի դեռ իրենց պահանջը չի կատարվել՝ իրենք չեն մասնակցելու կառավարության հրավիրած այս արտահերթ նիստին:
ԲՀԿ խմբակցության քարտուղար Նաիրա Զոհրաբյանի խոսքերով էլ՝ «4 քաղաքական ուժերը չեն մասնակցի արտահերթ նիստին այնքան ժամանակ, քանի դեռ որեւէ ձեւաչափով մեր առաջարկած արտահերթ նիստում գնահատական չի տրվի երկրում ստեղծված իրավիճակին»:
Կարդացեք նաև
Ուշագրավ է, որ խոսքը ՕԵԿ-ի, ԲՀԿ-ի, Ժառանգության եւ ՀԱԿ-ի մասին է: ՀՅԴ-ն չմասնակցեց բոյկոտին: Թեեւ չեն մասնակցում նաեւ քվեարկությանը:
Հռիփսիմե ՋԵԲԵՋՅԱՆ
