Aravot.am-ի հարցին, թե որոշ խոշոր տնտեսվարողներ, տոնական օրերին, առիթն օգտագործելով ժամկետանց ապրանքներ են «սաղացնում» սպառողների վրա, այդ օրերին վերահսկողությունն ինչպե՞ս է կազմակերպվում, առողջապահության նախարարության Հիվանդությունների վերահսկման եւ կանխարգելման ազգային կենտրոնի գլխավոր տնօրենի տեղակալ Նունե Բակունցն ասաց, որ հնարավոր չէ 24 ժամ վերահսկողություն իրականացնել, ուստի սպառողներն իրենք պետք է հետեւեն, որ սննդամթերքը լինի ժամկետի մեջ:
Ըստ ԱՆ մասնագետի, չի բացառվում, որ այն լինի ժամկետի մեջ, սակայն պահպանման պայմանները ճիշտ չլինեն: Տիկին Բակունցը խորհուրդ է տալիս ժամկետանց, կամ ոչ ճիշտ պայմաններում պահվող սնունդ հայտնաբերելիս, զգուշացնել խանութի պատասխանատուին:
Նունե Բակունցի մեկնաբանությունները` տեսանյութում
Նախարարության մասնագետը քաղաքացիներին հորդորում է կասկածելի սննդի կետերից սնունդ չգնել, հատկապես, երբ երեխաների համար է, իսկ ուտելիս էլ անպայման ձեռքերը լվանալ, կամ խոնավ անձեռոցիկով մաքրել. «Ավելի ճիշտ է կազմակերպություններում պատրաստվածը գնեք: Երեխաների նյութափոխանակությունը մեծերի նյութափոխանակությունից 3 անգամ ավելի է, քանի որ աճող օրգանիզմ են, այդ պատճառով նրանք ավելի շատ են ուզում տարբեր տեսակի քաղցր հեղուկներ: Բայց պետք չէ չարաշահել կոֆեինով կամ գազավորված ըմպելիքները: Երեխաներին նախընտրելի է թարմ սնունդ տալ»:
Կարդացեք նաև
Ամանորյա տոներին սնունդը օրերով պահելու սովորություն ունեցող տանտիկիններին էլ Նունե Բակունցը զգուշացնում է` 48 ժամից ավելի չի կարելի պատրաստած ուտեստ պահել. «Վտանգավոր են թթվասերը, մայոնեզը, կրեմային հրուշակեղենը, կաթնամթերքը, ձկնամթերքը առանց սառնարանի պահել, պատրաստման ժամանակ էլ պետք է հիգիենային հետեւել»:
Ըստ Նունե Բակունցի, հատկապես ձմռանը, պահածոներից արձանագրվող բոտուլիզմի դեպքերը ծանր ելքով են ավարտվում, եթե ժամանակին չեն դիմում բժշկի կամ օրգանիզմը թույլ է լինում:
ԱՆ մասնագետը սրտանոթային, երիկամային, շաքարային դիաբետ ունեցող հիվանդներին խորհուրդ է տալիս ալկոհոլը չչարաշահել, քանի որ այն թունավորում է օրգանիզմը. «Ալկոհոլը անոթները լայնացնում է, հետո անոթային սպազմ է առաջացնում: Ցածր թե բարձր տոկոսով ալկոհոլ պետք է օգտագործել շատ զգուշավոր, մենք պետք է կարողանանք տրամադրությամբ տոն սարքել, ոչ թե ալկոհոլով»:
Լուսինե ԲՈՒԴԱՂՅԱՆ
